Shillong, Nailur 2: Ka Hynniewtrep A’chik National Movement (HANM) ka pynpaw ïa ka jingkyrshan kaba skhem bad kaba shai ïa ka High Court Bar Association of Meghalaya, halor ki jingeh kiba la pynpaw shaphang ka rukom trei kam jong ka ophis jong u Advocate General jong ka Meghalaya, u Amit Kumar, khamtam halor ki jingkynnoh kiba ïadei bad ka jingthungkam, ka jingpynrungkam bad ka jingjied ïa ki briew kiba wan na shabar ka jylla.
Ka HANM ka ngeit ba ki jingkynnoh shaphang ka jingpynkylla, ka jingai jingïaid lynti kyrpang ne ka jingjied briew da ka rukom kaba ym ïahap ha ki kam kiba ïadei bad ka High Court, ki dei ki mat kiba khia bha kiba ktah ïa ka paidbah bad ym dei ban shu kheiñ sting.
Ki paidbah ka Meghalaya ki don hok ban ïoh ïa ka jingshai, ka jinglong transparent bad ka jingkitkhlieh na baroh ki kynhun bad ki jaka treikam paidbah.
“Ka High Court ka dei ka jaka treikam jong ka hok bad ka jingïaid lynti jong ka jingthungkam kaba ïadei bad ka High Court ka dei ban long kaba lait na ka jingshah ïaid kyrpang, ka jingpynkylla-kylla bad ka jingktah jong ka saiñ pyrthei ne ka jingmyntoi shimet” ong u Bah Lamphrang Kharbani
Ka Meghalaya ka don bun bah ki nongïasaid kiba la nang bha, kiba trei shitom bad kiba don sap, kiba wan na ki thaiñ Khasi Hills, Jaintia Hills bad Garo Hills.Ki samla kiba dang dep ïa ka jingpule Law bad ki Advocate kiba la don lypa ha ka kam ki don ïa ka jingnang jingstad, ka sap bad ka jingaiti lut ban shakri ïa ki kynhun bad ki jaka treikam jong ka aiñ hapoh ka jylla.
Ha kane ka por ba bun ki samla pule kiba la dep ïa ka jingnang jingstad ki dang ïakynduh jingeh ban ïoh kam, ka HANM ka buh ka jingkylli, balei yn shu kyntait ïa ki nongthep kam kiba na ka jylla kiba la biang ka kyrdan pule, haba ki lad kam ki mih hapoh Meghalaya?
Ka jingwanrah ïa ki briew na shabar ka jylla sha ki kam kiba lah ban pyndep da ki nongïasaid kiba la biang jingnang jingstad hapoh Meghalaya, ka lah ban pynhiar shuh shuh ïa ki lad ioh kam jong ki briew kiba la pynlut bun snem ha ka jingpule Law bad ha ka jingtei ïa ka kam jong ki.
Ka HANM ka pynshai bha ba ka jinglong jong ki kam long pyrshah ïa uno uno u briew tang namar ba u wan na shabar Meghalaya.
“Ngim dawa ïa ka jingai jingïaid lynti kyrpang ïa ki nongthep kam na Meghalaya; ngi dawa ïa ka hok, ka jingshai bad ka jingïakop kaba ïaryngkat ïa baroh ki briew kiba biang qualification na Meghalaya.”
Namarkata, ka HANM ka kyntu ïa ki bor ba dei peit ban bishar bniah ïa ki jingeh bad ki jingkylli kiba la pynpaw da ka High Court Bar Association bad ban pynthikna ba ka jingthungkam bad ka jingjied briew ka long kaba shai bad kaba laitluid.
Hangne ka HANM ka ong shai ba lada ka jingtohkit kaba laitluid ka pynshisha ba u Advocate General u Amit Kumar u la pyndonkam bakla ïa ka kyrdan jong u ne u la pynsniew ïa ka burom bad ka jingshaniah jong ka ophis, ka HANM ka ngeit ba ka jingbteng jong u ha katei ka kyrdan ka dei ban shah bishar bniah bha, kynthup ïa ka jingdawa ban weng noh ïa u ne ba un hiar shuki, katkum ki kyndon jong ka aiñ.
“Ka shuki paidbah ka dei ka jingkitkhlieh, ym dei ka jaka shimet jong uno uno.Lada ka jingkitkhlieh ka duh, ka jingshaniah jong ki paidbah ruh ka duh lang” ong u Bah Kharbani
