Shillong, Naiwieng, 18: Hadien ba ka la jingmih ka jingkhñium na ki nongwai dukan ha ka sngi sdang jong ka tamasa Cherry Blossom ha ka sngi Thohdieng namar ka jingbym biang kumba ki bor pynïaid ki la kular halor ki jingaiwai ïa ki dukan ne ki stall, u Myntri ka Sorkar Jylla Bah Paul Lyngdoh u la pyntikna ba ka Sorkar Jylla kan sa peit ba ki nongwai dukan ha kane ka tamasa kin ym mad ïa ka jingduhnong.
Ka Rocksi kaba long ka nongpynïaid ïa kane ka tamasa ka la hap ban pynsangeh ïa ka sngi sdang jong ka tamasa namar ka jingther jong u lapbah uba jur kaba la wanrah ruh ïa ka jingktieh jong ka madan Kurkalang kaba don ha ka shnong Bhoirymbong, Ribhoi District.
Ha ka jingïakren bad ki lad pathai khubor ha ka sngi Saitjaiñ u Bah Paul Lyngdoh u la ong, “ngam pat ïoh ïa ka kaiphod na ka liang jong ki nongpynïaid. Ngan pynkynmaw biang ïa phi ba kane kam dei ka prokram jong ka Sorkar, hynrei ka dei kawei na ki tamasa kaba ngi la ïatreilang bad ka Rocksi. U synñiang na ka Sorkar Jylla ka long shi klur tam duna ar klur bad ka pisa kaba sah nangta sa 7 klur eiei la pynlut hi da ka Rocksi.”
“Ynda ngi la ïoh ïa ka kaiphod ba ka don hangno hangno ka jingbym biang, ka jingduna, ngin pynthikna ba kan ym don ka jingdunong ïa ki nongwai dukan (ha kane ka tamasa),” la bynrap u Bah Paul.
U la ong ruh ba ka tamasa kan ïaid beit mynta bad lashai bad ki duhalia kiba la pynbeit ban pynlynguh ha kane ka tamasa ki bym shym la ïohlad ban kiew rynsan ha ka sngi sdang jong ka tamasa, yn sa ailad ba kin kiew rynsan mynta ka sngi bad kin don ruh ki ban sa kiew rynsan lashai ha ka sngi pynkut jong ka tamasa.
“Namarba la kham bun ki nongïashim bynta, ki bynta jong ka tamasa ruh kin kham bun, khnang ba kan ym don ka jingïatynruh bad kan ktah patde ïa ka rukom rung bad ka rukom mih jong ki paidbah,” la ong u Bah Paul.
