Shim bynta u Bishop ka Nongstoiñ Diocese ban pynhap pyrda ïa ka Jubili Rupa ka St. Claret Seminary

Nongpoh Naiwieng 18: Ban kyrtiangdien sha ki 25 tylli ki snem ka jingïaid lynti naduh ba la seng ha u snem 1998 ban long kum kata ka shlem ban ai jinghikai na ka bynta ki samla shynrang kiba angnud ban long ki Lyngdoh Sohblei, ka St. Claret Seminary Umsning ha ka sngi Saitjaiñ ka la pynhap pyrda ïa ka jingrakhe Jubli Rupa.
Ha kane ka jingrakhe ïa ka jubili rupa la sakhi lang da u Bishop jong ka Nongstoiñ Diocese, u Most Rev. Wilbert Marweiñ u la shim ïa ka bynta kum u kongsan ban pynbynta ïa ka Mass Bakhuid ryngkat ka jingsakhi lang jong u Bishop ka Jowai Diocese u Most Rev. Ferdinand Dkhar, u Provincial Superior Province ka North East India Fr Pius Turuthiyil, u Superior jong ka St. Claret Seminary, Umsning Fr. Tomy Akkapadickal, u Parish Priest jong ka Umsning Parish Fr Pius Shadap bad kiwei kiwei.
Kum ban pynkynmaw, ka St. Claret Seminary Umsning la seng ïa ka ha u snem 1998 bad ka dei kawei na ka shlem pule ban long Lyngdoh Sohblei jong ki samla shynrang kiba wan na ki longing jong ki riewngeit ka Balang Catholic.
Ha ka jingïaid lynti kaba 25 snem kynthih bun ki samla ki la poi sha ka jinglong Lyngdoh Sohblei na ka bynta ban shakri ha ka Bri Sohwaiñ u Trai.
Haba kren ruh ha kane ka sngi, u Bishop Wilbert u la ong ong, “ka jingïatylli bad ka jingïatrei lang la ka long ha ka kam Balang ne ha ka kam jong ka imlang ka sahlang, namar dei tang lyngba ka jingïatrei lang bad ka jingïatylli ki ngi lah ban kynjoh sha ka thong jong ka jingim. Ka ladei ka jingim ba kynja mynsiem ha ka kam jong u Blei ne ki kam kiba dei na ka bynta ka bha ka miat bad ka roi ka par jong ka imlang ka sahlang.”