Shillong, Naiwieng 18 : Kum shibynta ban rakhe ïa ka Janjatiya Gaurav Diwas-Tribal Pride Week, ka Sankardev College, Shillong ryngkat ka jingïasnoh kti lang bad ka Department of Arts and Culture, Government of Meghalaya, ka la pynlong ïa ka jingpyni paidbah halor ka jingshad tynrai jong ka jylla Meghalaya ha ka 16tarik Naiwieng 2023 ha U Soso Tham Auditorium.
Ka phangpdeng jong kane ka program ka long “Synthesis of Rhythm and Art: Revisiting and Promoting the Cultural Heritage of Meghalaya”. Kane ka program la pynlong kyrpang khnang ban ïoh wanrah lut ha kawei ka rynsan ïa ki Jingshad tynrai, khamtam eh ïa ka jingshad kiba kham ñiar ban ïohi ha ki por ba mynta.
Ka thong jong kane ka program ka long ban buh jingkynmaw ïa ki jingshad kiba la ieh shadien da ki longshuwa manshuwa ha ryngkat ka kup ka phong tynrai ha ka por ba ki shad kumjuh ruh ha ki sur kynud tynrai. Ïa kane ka program la pynlong khnang ruh na ka bynta ban ai jinghikai bad jingtip ïa ki longdien mandien halor ka jingriewspah ka kolshor jong ki bad kumno ba kin pynneh pynsah ïa kaei kaba ki longshuwa manshuwa ki la pynkham pynsoh.
U Bah Paul Lyngdoh, Myntri ka Sorkar Jylla ba dei peit ïa ka Arts and Culture, u la long u Kongsan ha kane ka program. Ha ka jingkren ka jong u, u la ïaroh ïa ka college ba ka la shim khia ïa kane ka phang ha ka ban kyntiew, pynkynmaw bad pyrshang kumno ban pynneh pynsah ïa ka kolshor bariewspah jong ka jylla ka jong ngi.
Ha kane ka program la ïa don lang u Bah Frederick Kharkongor IAS, Commissioner & Secretary ka sorkar jylla, Bah F Doph, IAS, Secretary ka sorkar jylla, Vice Chancellor MLCU Prof T Kharbamon, Padmashree Theilin Phanbuh, Kong Silbi Passah, Sangeet Natak Akademi Awardee, ki Principal jong ki College bapher bapher. Ki nongmihkhmat jong ki Seng Bhalang, ki riewpawkhmat ka jylla, ki khynnah pule jong ki college bad university.
Ka Dr. Eureka F P Lyngdoh, Principal jong ka Sankardev College, ka la ai ïa kyntien pdiang sngewbha bad ka Kong Evarilang Tariang, nonghikai ka College, ka la kren halor ka jingthmu bad ka thong jong kane ka prokram.
Ha kane ka program la wan ïashim bynta da 22 tylli ki kynhun na ki bynta bapher jong ka jylla. Na ka Khasi Hills, Ki jingshad ki long ka Shad Suk Mynsiem, ka shad Mastieh (Ha Tbian Ki Sur Hara), ka Shad Mastieh (Hima Khyrim), ka Shad Thma bad ka Shad Shut-wait. ka Shad Skain kaba dei na Wahkhen, ka Shad Kiew Iing na Nongstoin, ka Shad Rongkhli na Nongtalang, ka Shad Khynrum na Lynngam.
Na ka Ri Bhoi district, ki jingshad ki long ka Shad Nguh Meikha, ka Shad Rah Kynthei, ka Shad Bhoi Lasa, ka Shad Krud Kba bad ka Shad Ïapngar. Nalor kita ka don ruh ka jingshad Domahi na ki Karbi.
Katto katne na ki jingshad ki kynthup ïa ki Jingshad na Jaintia hills kum ka ka Chad Laho, Chad Sukra bad Chad kylla Pliang katba ki jingshad na rilum Garo pat ki kynthup ïa ka jingshad Wangala, ka Ruga, ka jingshad Hajong bad jingshad Koch.
Kine ki jingshad kiba la kdew haneng bad ki jingshad na ka kynhun Jaidbynriew Khasi-Jaintia bad Garo, ki dei kita ki jait jingshad kiba pynpaw shynna ïa ki dak ki shin khamtam kiba don ka khana ban ïathuh shaphang ka jingsngewnguh, ka jingshlur, ka mynsiem ba shynrang, ka jingkmen bad ka jingsngewsih.
