Nongstoiñ, Naiwieng 18: U sying u dei u mar rep ba ki paitbah nongrep ha West Khasi Hills, ki ïa beh bha bad u ba mih bha ha ki jaka kiba syaid kum ha ki shnong khappud bad ka Assam, kata naduh ki thaiñ Muliang haduh Nongtrai hi kumba 80% na ki nongshong shnong ki im da ka rep sying bad synsar.
Ha kine ki khyndiat sngi ha ka jingleit jurip ïa ki shnong ha khappud jong ka West Khasi Hills bad ka East Garo Hills, kata naduh Japung, Mawkohram, Dambur, Borkhe, Missei bad kiwei kiwei, la ïoh ban leit ïakynduh ïa ki nongrep sying kiba na kitei ki shnong ha ka por ba ki leit ban die ïa u sying ha ïew Mangsang, khappud bad ka North Garo Hills District, ha kaba ki la ïathuh ba ha u snem ba la dep, ka dor jong u sying ha katei ka ïew ka poi tang kumba arphew tyngka shi kilo. Hynrei mynta u snem ka la kiew bad kiba wan thied sying ha katei ka ïew ki dei na Assam, kata naduh Dudnoi, Dhupdhara bad kiwei kiwei ki jaka.
Ki la ong ruh ba haba ki pynpoi ïa utei u mar rep ha katei ka ïew, ki shem jngeh bha namar ki Mahindra pickup ki nud ban kit tang san haduh shiphew byrni namar ym pat don jingkieng ba skhem lyngba ka wah Ryndi. Hynrei, ki hap ban ïaid lyngba kawei ka jingkieng dieng kaba shu shna malu mala da uwei u riew shimet bad katei ka jingkieng kam skhem satia.
Ki la ong ruh ba ki nongshong shnong katei ka thaiñ kiba leit ïew da ka Sumo haba la poi ha katei ka jingkieng, ki hap ban hiar noh shuwa bad tang u nongñiah u hap ban shong bad ynda la lait sha shilliang ki sa kiew biang ha ka kali.
Na shilliang katei ka jingkieng haduh ha ïew, ka don tang kumba shi kilomitar ei ei hynrei na jingkieng haduh ka bynta ba pynïasoh bad ka National Highway, ka don tang kumba arspah mitar ei ei hynrei ka surok pat ka sniew bha. Katei ka ïew Mangsang ka dei ruh ka ïew kaba ha tduh eh jong ka East Garo Hills, ha kaba ki nongshong dukan ki dei ki Assamese bad katto katne ki Khasi bad ka don ruh ka Police Out Post harud jong katei ka surok bah.
