Shillong, Naiwieng, 18: U Myntri ka Sorkar Jylla Bah Paul Lyngdoh ha ka sngi Saitjaiñ u la ong ba ka long kaba eh ban pynhun lut ïa baroh bad u la kyrpad ïa ki ASHA ban wan sha ka miej jingïakren bad ki bor badei peit khnang ban dup lah ban pynurlong ïa ki jingdawa ki jong ki.
Ha ka jingïakren bad ki lad pathai khubor u Bah Paul Lyngdoh u la ong, “ka Meghalaya ka la leh kham bha ïa ki nongtrei ASHA lada ïanujor bad kiwei pat ki jylla bad haba ngi la ai ïa ka Fixed Renumeration ka ladei ban don pat ka jingsngewnguh na ka liang jong ki (ASHA).”
“Manla ka jingeh ka don ka lad, nga ngeit ba da kata ka mynsiem ba ngin peit kaei kaba bha tam na ka bynta ka jylla, ngin ym ïa trei eh tang ban ong ba ma nga, nga dei bad kiwei ki bakla hynrei da ka mynsiem jong ka jingsngewthuh lang jong ka jingdonkam ki paidbah. (Kin) sngewthuh lang ba ngi don hangne ym tang ban ong ngin ïoh katno hynrei ba ngin ai ruh katno. Kata kein kaba kongsan. Da kata ka mynsiem kaei ka bym lah ban leh, baroh kaba leh ban leh,” u la ong.
“Nga sngew ba ka Myntri ba dei peit ïa ka tnat ka Koit ka Khiah ka la shimkhia bha ïa kane ka kam. Ha kane ka kam ban pynlut ïa baroh ka shitom bha namar kiba ngi hun bad kiba ngin ym hun kin don beit hynrei kaei kaba ngi la lah ban leh na ka Sorkar ka long ba ka Myntri ka la ai ruh ïa ka jingkular ba lada dang don ki jingduna yn sa nang pynbeit. Nga sngew ba la biang ha ka jingshisha bad ym dei ban ong ba la khang noh ïa ka jingkhang ban ym ïa pynbeit,” la bynrap u Bah Paul.
U la ong shuh shuh, “u don u pud ïa kiei kiei, ngim shym la leh beiñ ïa ki bad ngi dei ka Jylla kaba ngi la ai ïa ka jingsiew bainong kaba biang tam napdeng kiba bun ki jylla.”
“Ha ka kam shakri paidbah, ngi dei ban wan shakhmat bad kiba kylluid ban ïakren khamtam ba kane ka kam ka dei hi ka bynta jong ki (ASHA). Ban randien da kaba shu ïakhih sha surok kam dei ka lynti, hynrei ki dei ban ïakynduh ïa ka Myntri kaba dei peit ïa kano kano ka kam kaba dang sahteng,” la bynrap u Bah Paul.
