Shillong, Nailur 20: Kum shi bynta ban kyntiew ïa ka jingïalehkai kriket hapdeng ki kynthei, ka Meghalaya Cricket Association kan pynlong ïa ka 1st Senior Women’s Interstate Friendship Tournament na bynta ki jylla North East, ba la pynlong hapoh ka jingkhmih jong ka North East Cricket Development Council, ha Nongkhrah kaba ha Ri-Bhoi, naduh 30 tarik Nailur, 2024.
Kane ka lympung ïalehkai T20 kan kynthup ïa hynriew tylli ki jylla NECDC – ka Arunachal Pradesh, Manipur, Meghalaya, Mizoram, Nagaland bad ka Sikkim. Katba, ka Nagaland Cricket Association kan pynlong ïa ka 2nd Senior Men’s Interstate Friendship Tournament, ka ba yn pynïalehkai haduh 50 over katkum ka rukom pynïaid ha ka one day format.
Ka NECDC kadei ka kynhun kaba khmih bad pynïaid ïa baroh ki kam kiba ïadei bad ka jingpynroi ïa ka kriket ha ki hynriew tylli ki jylla ha ka rukom kaba ïatylli.
U nongseng bad Co-Convenor ka NECDC u Nababrata Bhattacharjee (uba dei ruh u President jong ka MCA) u la pyntip ha kane ka sngi Thohdieng ba kane ka lympung ïalehkai jong ki shynrang kan long naduh ka 23 tarik haduh ka 28 tarik Nailur bad yn pynlong ha ki ar tylli ki jaka – ka Nagaland Cricket Stadium bad ka Sovima Cricket Ground.
Katba ïa ka lympung T20 ba nyngkong jong ki kynthei yn pynlong ha madan ïalehkai ba dang shu thaw thymmai jong ka Meghalaya Cricket Association, ha Pahamsning, Nongkhrah, ha Ri-Bhoi district naduh ka 30 tarik Nailur haduh ka 4 tarik Risaw.
Baroh ar tylli ki lympung ki long kum ka jingpynkhreh na bynta baroh ki kynhun shuwa ban sdang ki jingïalehkai ka lympung BCCI 2024-25, ka ban sdang naduh u Risaw.
Ha ka lympung lehkai jong ki shynrang, ka Nagaland, Sikkim bad ka Mizoram ki la shah pynïakap hapoh ka Group A, katba ka Group B ka kynthup ïa ka Meghalaya, Manipur bad ka Arunachal Pradesh.
Ha ka lympung ki kynthei, ka Meghalaya, Arunachal Pradesh bad ka Manipur ki la shah pynngat hapoh ka Group A, katba ka Nagaland, Mizoram bad ka Sikkim ki la shah thup hapoh ka Group B.
