Shillong, Risaw 21: Ka Nongkseh Sport & Cultural Club (SS&CC) kan khreh ba kan sdang ïa ka jingïakhun ba nyngkong jong ka ha ka I-League 3 2026-27 mynta ka sngi Palei, ka 22 tarik Risaw, 2026 pyrshah ïa ka Kuppuraj FC ha ka por 5 baje janmiet, ha SSA Stadium, Polo.
Haba ai jingkren sha ki lad pathai khubor hynne ka sngi Balang, u President jong ka kynhun bah Daniel Thangkhiew, u la ong ba ka kynhun ka la ïoh ban ïashim bynta ha kane ka lympung kyrdan jong ka ri hadien ba ka la long ka lahduh jong ka Meghalaya State League 2026.
Ha kane ka lympung, ka Nongkseh ka la shah kynthup ha ka Group C ryngkat ka Chhaygaon FC na Assam, ka Lakecity FC na Madhya Pradesh, ka Godavari FC na Andhra Pradesh bad ka Kuppuraj FC na Pondicherry. ïa ka kynhun yn ïalam da u Joseph Naik kum u coach bad u Hardy Cliff Nongbri kum u kapten.
U bah Daniel Thangkhiew, ula kdew ba ka kynhun kan pynïalehkai tang da ki rangïalehkai trai jylla ha kane ka lympung, bad nalor ki rangïalehkai kiba la mihkhmat ha ki lympung ba ladep, ka klob ka la soi sa lai ngut ban kham pynkhlaiñ ïa ki katto katne ki bynta.
Kine ki lai ngut kiba la shah soi ki kynthup ïa u Ieitlang Syiemlieh bad u Owanijuh Pajuh na ka Bhawanipore FC kaba ïalehkai ha ka Calcutta Football League, bad u rangap kol ka Shillong Lajong FC u Wanteilang Malniang.
“Ka jingpynkhreh ka la ïaid shakhmat bad ngi ngeit ba hadien ba ngi la ïoh ban rah ïa ka SSA Super Cup bad da ka jingwan jong kine lai ngut ngin sa lah ban ïoh ïa ka jingjop ha kane ka I-League 3,” la bynrap u bah Daniel.
Na ka liang jong u Kapten, u Hardy Cliff Nongbri u la ong, “Ka thong jong ngi kam dei ba ngin ïalehkai tang hangne hapoh Shillong hynrei ka jingthrang ka long ba ngin sdang naduh ka I-League 3 bad nangta ngin ïaid kawei ka kyrdan hadien kawei pat ba ngin poi shaduh ka IFL”.
Kiwei pat ki jingïalehkai jong ka Nongkseh ki long ha ka 24 tarik Risaw pyrshah ïa ka Chhaygaon FC, nangta ïa ka Lakecity FC (28 tarik Risaw), ka Godavari FC (30 tarik Risaw).
Da kaba ïakhun hala ïing ryngkat ka jingkyrshan jong ki paidbah ka kynhun ka kyrmen ban pyndonkam ïa kane ka kabu sha ka jingmyntoi ban thaw ïa ka lynnong kaba thymmai ha ka jingïaid lynti jong ka klob.
