Nongpoh, Naiwieng 26: Ki nongïalam shnong ka shnong Belahari, kawei na ka shnong ha khappud bad kaba hap ha Hima Nongkhlaw mynta ka sngi ha ka Executive Committee, ki la mih ban pynshai paidbah halor ka jingmih ha ki lad khubor, ba ka Shnong ka la beh shnong ïa ka Kong Morias Rani ba ka long kaba bakla, hynrei ka shnong ka la shu sospon ïa ka kum ka Nongshong shnong bad ai por 5 sngi ba ka hap ban wan ïa kren bad ym ka rai ban beh shnong halor ki kam ïaleh pyrshah jongka ïa ka shnong.
Haba kren sha ki lad pathai khubor, ki nongïalam shnong naduh u Rangbah shnong u Bah Peter Stone Syngkli, u Secretary Shnong u Bah Khrawpyrkhat Rani bad u Rangbah Shnong barim u Bah Active Pator, ki la pynshai ba ka rai ban beh shnong ia ka Kong Morias Rani kam dei satia ka rai jong ka Dorbar shnong bad ka dei tang ka jingiakren ki paidbah nongshong shnong kiba la bitar palat ha lor ki kam ialeh pyrshah katei ka longkmie ïa ka shnong.
Ki la pynshai ruh ba kane ka huri hura ka la sdang naduh u snem 2011 ba la lap ïa ka jingleh tuh katei ka Longkmie ban register tuh ïa ka khlaw jong ka shnong bad dei hadien ba la pyrshah da ka shnong ka sa pynmih ïa ki kynrum ki kynram bad ka pynthud ruh ïa ki paidbah bad ïa ka shnong da kaba ju ujor beit sha ka tnad Forest ne ki Pulit ka Assam ban kam trai ïa katei ka jaka wat la ka dei kaba hap ha ka Hima Nongkhlaw ha ka jylla Meghalaya.
Ki la ïathuh ruh ha ka jingshisha ka shnong kam kwah ban mih kano kano ka huri hura bad ka kwah ban wan rah ïa ka jingsuk hapoh ka shnong ka thaw, ha kaba kiwei ruh ki 5 ngut kiba pyrshang ban leh thok ïa katei ka khlaw ki la wan sha ka miej jong ka jingïakren ban pynduh noh ïa katei ka register jong ka khlaw, hynrei dei tang kane ka Longkmie kaba ïaleh pyrshah bad kaba ym pyndem satia hakhmat ka shnong, ha kaba ïa katei ka khlaw shnong ym don ba lah ban kam nongkynti bad ka dei ka khlaw shnong kaba peit ba khmih da ka shnong bad ym da ki riew shimet.
Ki la ong ruh dang shen ruh la khot ïa kren ïa katei ka Longkmie bad la ai ruh da ka jingthoh ban wan sha ka Dorbar, hynrei dei maka hi kaba ïaleh pyrshah khlem da wan sha ka Dorbar kaba la pynsat lut ïa ki paidbah halro ki kam ïaleh pyrshah ïa ka shnong bad khlem da burom ïa ki paidbah nongshong shnog bad ki nongïalam shnong.
Ki la pynshai ruh ha katei ka dorbar ba la dep ka shnong ka la shim rai ban ai por 5 sngi ba ka hap ban wan jubab sha ka shnong la kan pyndem neem ïa ka shnong bad ka rai kaba khatduh kan long ha ka 29 tarik u Naiwieng 2024, ha kaba ha katei ka sngi un don lang u Syiem ka Hima Nongkhlaw ban shim ïa ka rai kaba khatduh halor kine ki kam ïaleh pyrshah katei ka Longkmie ïa ka bor shnong.
Shuh shuh, ki la pynshai ruh ba katei ka Longkmie ka dei shisha ka Longkmie kaba la wan rah ka jingpynjynjar ïa ka shnong bad ïa ki paidbah bad dei tang na ka daw jongka, ki mih ruh ki kam huri hura bad ka ju ïaleh pyrshah ruh ïa ka shnong haba ka leh ïa ki kam pynroi kum ka jingpynbha ïa ka surok bad kiwei kiwei ki kam kiba ktah ïa ki nongshong shnong ba ka ju ujor sha Assam tang namar ba ka ioh Lok da u bar jylla na Assam.
Namar kata, na ka liang ka shnong ka pynshai paidbah ba haduh mynta kim pat beh shnong bad ka shnong kan shim ïa ka rai kaba khatduh ha ka jingdon lang u Syiem ka Hima Nongkhlaw, ba kin sa pynlong ïa ka jingïalang ha ka 29 tarik u Naiwieng 2024 bad dei ha katei ka sngi ba ki paidbah nongshong shnong, ka shnong bad ka Hima kin shim lang ïa ka rai kaba tyngeh halor kine ki kam ïaleh pyrshah katei ka Longkmie, ki la bynrap.
