Nongpoh, Jymmang 02: U Bah Linus Lyngdoh, Lyngdoh Raid ka Raid Nongpoh mynta ka sngi u la ther ïa u nongïalam ka Hills Farmer Union u ba la leit ban kyrshan biej ïaki briew kiba kam kum ki nongrep ha u Lum Wortoh bala tip ruh kum u lum kyntang khlem da tip ïaka sdang ka duh bad ka jingshisha bad khlem da wad jingtip shuwa naki nongïalam ka Raid.
Haba kren sha ki lad pathai khubor naka liang u Bah Linus Lyngdoh u la ong ba ngi sngewtynnad eh ïaki nongïalam ka HFU ba kila wan ban kyrshan lang ïa kitei ki briew hynrei haka juh ka por ngi pynpaw ka jingsngewsih ba kat ka kyrdan Secretary ka HFU sengkmie phi batai stad khlem da tip ïaka sdang ka kut bad tang haka jingshah pynbiej ha uwei ar ngut ki riew shim kabu, haka jingshisha shuwa ba phin kren phi la dei ban ïakynduh shuwa ïaki nongïalam Raid bad ban sngap ruh aiu ka Raid ka don ban ong ha kaba iadei bad kane ka bynta.
Halor ka jingkren utei u nongïalam ka HFU ban ai dulir ïa kitei ki nongrep naka liang ka raid Nongpoh kala pynphai ktien sngewbha ai da ka jaka jong phi namar naka liang ka Raid Nongpoh kan nym ai ïaka jaka kaba ngat ha utei u Lum Kyntang.
Naka liang u Bah Linus Lyngdoh u la ong ruh ba ngi sngew lyngngoh kumno utei u nongïalam ka HFU u ïanujor ïa kane ka bynta bad ka Lapangap, ka Mawsikar kane kam dei ka mat ba ïadei bad ka khappud ssngewbha wat nym pynsngewthuh bakla ïa u paidbah.
“Phi ong ba ki dei kiba duk lada ka Raid ka shim jaka kin sa shah thngan, hynrei to tip ba tang kiba riew spah kiba iohlad ban rep kwai namar ban sara ka shimpor haduh 3 snem bad haduh ban da kheit ki hap ban ap haduh kumba 10 snem, te kamut ha kine ki 10 snem ki shah thngan bad kane baroh ka dei tang ka jingpynsngewthuh bakla ïaki paidbah ban ioh kawang ktieh ïaki nongïalam ka Raid” la ong u Bah Linus da kaba bynrap ruh ba napdeng kito ki briew kiba wan ban pynkulmar ha kato ka sngi ha ophis ka Raid ki don kiba treikam sorkar ki don kiba don haduh 3 ne 4 tylli ki jaka rep bad ki don ruh kiba la dep die ïaka jaka ba ki ioh naka Raid, don ruh kiba la pynlong mar khaïï iaka jaka jong ka Raid namar ki kam shi snem ar snem bad hadien kata ki sa ai wai pateng sha kiwei pat ban kamai spah na katei ka jaka Raid.
U la ïathuh ruh ba don ruh kiba shu skud ban ioh pom pathar ïaki dieng ki siej dei na kata ka daw ngi iohi ba ki don shibun ki nongrep ha kane ka list naduh Umtyrnga, 18 mer, Lumbyrhing wat ba Dawki ruh, naei ki mih ki kita? namar dei ka jingai wai pateng sha kiwei pat ki briew ha jaka ba kin sngewnguh ïaka Raid ïaka jaka ba kila ioh ban rep katta snem, hynrei mynta pat ki pyni bor kylla
Halor kane ka bynta ka u Bah Linus u la ong ba ka Raid Nongpoh kam ju leh shilliang ïano ïano ruh ka kdup lut ïa baroh ki briew jong ka bri u hynniewtrep kiba rep ha jaka jong ka Raid, kumta naka liang ka Dorbar Pyllun ka Raid Nongpoh ba kynthup ïaki 7 kur 7 kpoh ngi kwah ban pynpaw ba ngim shah shuh ban don kiba skud ne kam trai ïaka jaka rep kaba don ha u lum Wortoh namar u dei u lum kyntang jong ka Raid, u lum bala suid la shor naduh ki mynbarim ryngkat ki sakhi u ryngkew u basa.
“Kata snem phi la im ban rep mynta ngi donkam ban pynbha ïa une u lum sngewbha ailad ïangi ban leh ia kaba donkam khlem da pynmih ka jingkulmar kumba la dep ïakut bad ïasoi ha u snem 2022” la bynrap u Bah Linus.
