Thung da ka HLC ban buddien halor ka jingpyntreikam ïa ka 465 klur tyngka : Katakey

By Mawphor Editor On May 4, 2026

Shillong, Jymmang 3 : Ka Committee jong u Justice BP Katakey ka la ai jingmut ïa ka sorkar jylla kat kum ka kaiphod ba 37 ba la ai sha ka ïing Bishar Hihg Court jongka jylla ban thung da ka High Level Committee (HLC) na ka bynta ban bud dien halor ka jingpyntreikam ïa ka 465 klur tyngka na ka bynta ban pyndap ïa ki thliew ki syar ki krem ki kroh bad kiwei ki jingpynjot ïa ka mariang na ka jingtih dewiong beaiñ ha Meghalaya.
Ha ka kaiphod ba 37 ba la ai sha ka ïing Bishar High Court ka Committee ka la ong donkam ban don ka kynhun ka ban peit bad bud dien halor ka jingpyntreikam ïa kane ka pisa kaba la mynjur da ka Oversight Committee ba la thung da ka NGT.
Kane ka pisa ka kynthup ïa ka 100 klur tyngka ba la thep sha ka Central Pollution Control Board (CPCB) bad 365,84,78,884 klur kaba don bad ka Meghalaya Environment Protection and Restoration Fund (MPRF).
Ka Committee ka la ïohi ruh ba ka Oversight Committee ka la pdiang bad mang 17,52,34,294 klur na katei ka 100 kaba don bad ka CPCB bad 48,47,53,416 klur na ka pisa kaba don bad ka MEPRF.
ïa kane ka High Level Monitoring Committee dei ban khlieh da u ophisar ha ka kyrdan kaba ïa ryngkat bad u Additional Chief Secretary ka jylla ryngkat u Secretary ka Finance Department, Secretary Mining and Geology, ki khlieh jong kitei ki tnad kiba la pynkhamti ban peit bad pynïaid shakhmat ïa kane ka kam.
Donkam ruh ban leh da ka kam lada ka HLC ka lap ei ei halor ka jingpyntreikam lane lada jia ba pynslem pyntreikam ïa kine ki projek. Khamtam lada lap ba ym shym la pyntreikam ne ba pyndonkam bakla ki bor ba dei khmih ki dei ban leh da kaba tyngeh kat kum ki bor ka aiñ.
Ka Committee ka bthah ruh ban ai kloi noh ïa ki jingtyrwa na ka bynta ban pyntreikam noh ïa ki project na ka pisa ba dang sah na katei ka 100 klur tyngka bad ka CPCP bad ka 365,84,78,884/ – tyngka kaba dang sah bad ka MEPRF.
ïa kane dei ban shim khia da u Secretary ka Mining and Geology khnang ba yn lah ban pyntreikam sted ïa ka pisa na ka bynta ka jingmyntoi jong ki paidbah khamtam eh ïa kito kiba la shah ktah jur na kane ka jingtih dewiong beaiñ.