Shillong, Jymmang 03: Ka Centenary Jubilee jong ka General Assembly Prebyterian Church of India (PCI) kaba 6 sngi kaba la sdang naduh 28.04.2026 ha ka Balang Presbyterian Phudmuri, KJP Synod Sepngi ka la kut noh mynta ka sngi u Blei ha JN Sports Complex, Polo. Da ki phew hajar ngut ki paidbah riewngeit khristan ki la wan na kylleng ka Ri India, ban sakhi ïa kane ka Jubilee, ha kaba ha ka sngi Saitjaiñ la ïoh ban plie ia u mawtablet Jubilee da u Moderator Rev. H.L. Marsing ha Madanheh Mawlai. Nalor ka jingpyllait ïa ka Souvenir da u Rev.Dr.H. Rengthanga, kiwei pat ki programme, kaba ktah mynsiem eh dei ka jingrwai bapawnam ba kyrteng “Halleluiah Chorus” ba la thaw da u Handel Messiah ba la rwai da United Choir ka PCI kaba kynthup ïa ki 12 tylli ki Synod hapoh jongka.
Ha ka jingïaseng ba 10:30 mynstep ha JN stadium, la ïoh jingkren da u Rev. L.S Nongphlang bad ka jingrwai kyrpang na ka Jingiaseng Khynnah Balang Prebyterian Phudmuri nalor kiwei pat ki choir kum ka Biateram Synod,Cachar Hill Tribe Synod, Karbi Anglong Synod & Manipur Synod. Katba ha ka jingiaseng ba 1:30 PM, la ïoh jingkren da u Rev. D.C. Haia senior pastor ka Mizoram Presbyterian Synod bad la pynkylla Khasi da u Rev. Lyndan Syiem. Ka khubor ktien Blei la pynshong nongrim na ka shithi u Paul sha ki Roman 11: 33-36, u pynkynmaw ïa kajingjylliew jong ka jingkynreispah u Blei ha baroh ar la ha ka jingstad ne ka jingshemphang. La u briew u pyrshang katno katno ha ka jinglah jong u pynban kam pat kot bad ka jingstad bad jingkynreispah jong u Blei, naba um donkam ban pan kylliang nangno nangno ruh, namar baroh khoit kaba habneng bad ha ka khyndew baroh ki dei ki jong u bad katba u dangai katta ka nangkyrsoi, lada u ai jingmapei ïa u nongpop, ha u Blei kam ju duna jingmapei, naba ka ïai kyrsoi.
U pynkynmaw ba dei u Blei uba ai lut ïa ki jingdonkam jong ngi baroh. Nalor nangta, u nongkren u pynkynmaw ïa kaei kaba u Paul apostol u kylli, uei uta uba la tip lypa ïa ka jingmut jingpyrkhat jong u Blei bad uei uba lah ban long nongiasyllok jong u Blei…naba u briew u pyrkhat tang ïa ki minit katba u Blei pat u pyrkhat ïa ki millenium, u briew u ïohi ïa ka jingduh jingkyrmen katba u Blei pat u dap da ka jingkyrmen suda, kumjuh u briew u ïohi ïa ki jingkutlad katba ma u pat u ïohi ïa ki kabu ksiar. U Pastor Haia u pynkynmaw ruh ba u briew um lah ban pynbamnong (bribe) ïa u Blei ban ïoh jingmyntoi kylla na u, em. Nalor nangta, u Blei u ai ïa u Mynsiem Bakhuid hangi ban ngin pynkupbor ha ka jingïaid pilgrim jongngi. Khatduh, u nongkren lyngba jong ka khubor, u pynkynmaw ba dei u Blei uba pyndap pynbiang bad uba ïalam ïa ki briew jong u, kam dei satia ka jinglah jong ngi ba ngi la ïaid lyngba ïa ki 100 snem ba la leit hynrei dei ka jinglehphylla jong u. Kumta ka Centenary Jubilee jong ka general Assembly PCI, ka dei ka jingkhot ban nangpynskhem shuh shuh kum kawei ka met u Khrist bad ka longïing baskhem jong u Blei. La pynshitrhem ïa ka jingïaseng paidbah da la kingrwai ba kyrpang jong ka KJP Synod Mihngi, Mizoram Presbyterian Synod, KJP Synod Sepngi , Choir ka Balang Presbyterian Phudmuri, ka Balang kaba pdiang ïa ka PCI. La ïoh ruh ban pynkupburom ïa u Rev. B.R. Kharnaior uba dang shu shongthait na ka kam Senior Administrative Secretary PCI.
