Nongstoiñ, Jymmang 04: Ka Little Star English Secondary School sa shisien ka la rah biang ïa ka nam lahduh ha ka lympung ïalehkai sports ki khynnah skul, kaba dei ruh ka lympung kaba san kaba la tip kum ka 5th EWKH District Level Inter School Athletics Meet jong u snem 2026. Kane ka lympung ka dei kaba la pynlong da ka ophis treikam jong ka District Sports Officer (DSO) West khasi Hills District ha ryngkat ka jingïatreilang bad ka District Sports Association Mairang.
Ïa kane ka lympung kaba lai sngi lynter, la pynlong ha madan Khadsawphra College Mairang ïa kaba la pynhap pyrda noh ha ka 1 tarik Jymmang, ha kaba la ïoh ban sakhi ïa ka jingïashimbynta shitrhem jong ki khynnah skul kynthei bad shynrang kiba kot haduh 800 ngut na ki 26 tylli ki skul napoh kane ka District Eastern West.
La wan ban pynhap noh ïa ka lama jong kane ka Lympung da u President ka MSOA, u bah John F Kharshiïing kum u Kongsan, ha ryngkat ka jingïadonlang ka DSO WKH ka kong Balarina Syiem, u Sordar ka shnong Pyndengumiong u bah Bornad Syiemiong, ki Principal na ki skul bapher bapher ki nonghikai, ha ryngkat ki khynnah skul.
U bah John Kharshiïing haba kren ha kane ka sngi, u la ong ba ym dei pyndonburom tang ïa kiba jop, hynrei ban ïakmenlang wat ïa kito ki bym shym la jop ruh kiba don kata ka mynsiem ban ïashimbynta, da kaba pynpaw ba ka jingïashimbynta ki khynnah skul U-14, U-16 bad U-18 ki long kiba donkam bha, kiba na ka liang ka tnad Sport, ki pyrshang ban jied bad ban wad ïa kiba don ka sap ba kyrpang.
U la ong ba kane ka jingïashimbynta ha ka District Level ka dei ka jingsdang ka jong ki da kaba kyntu ruh ba kin dang ïai trei shitom bad minot ha ka kilan met, khnang ba ka Jylla kan lah ban sei ïa ki ha ka National, International bad ha ki Olympics na ka Jylla la jong.
La ïoh ruh ban sam ïa ki khusnam sha ki rang bad ki thei ïalehkai kiba kynsai da ki Syrnod ha ryngkat ki Trophy, ha kaba ka lahduh ka Little Star ka la khur bun ki Trophy. Katba ïa ka nam best Discipline team la ïoh da ka Langtor Hr Sec School bad ïa ka nam best March pass la rah da ka Pyndengumiong Presbyterian HSS.
