Tyrwa ka M’laya ïa 39 tylli ki jingïalehkai na ka bynta ka 39th National Games 2027

Shillong, Naiwieng 05: Ka Games Technical Conduct Committee (GTCC) jong ka 39th National Games ha ka sngi Palei (05 tarik Naiwieng, 2026) ka la pynpaw ïa ka jingsngewhun ha kaba ïadei bad ka jingpynkhreh jong ka jylla Meghalaya ban pdiang bad pynlong ïa kane ka lympung bah jong ka ri ha u snem ban wan.
Ka Committee ka la pynpaw ïa kane ha ka jingïalang ba la pynlong ha State Guest House hadien ka jingpyndep ïa ka jingwan jurip kaba saw sngi ïa ki katto katne ki jaka ïalehkai kiba don ha kylleng ka nongbah Shillong bad Jowai.
La lamkhmat ïa ka GTCC da ka Chairperson ka Sunaina Kumari ryngkat ki dkhot ba kynthup ïa u Ravinder Choudhary, Maninder Pal Singh, V. Sunil Kumar bad u Dushyant Sharma. Ha ka jingïalang la ïadon lang ruh u Working President ka MSOA bah John F. Kharshiing, Vice President kong Matsiewdor War Nongbri, General Secretary bah Finely L. Pariat bad Director ka tnad Sports bah Alertson Nongbri.
Haba ai jingkren sha ki lad pathai khubor ka Sunaina Kumari ka la ong ba ka komiti ka la sngewhun ban ïohi ïa ki kam pynroi ha ki jaka ba thmu pynlong ïa ki jingïalehkai.
Ka Sunaina ka la pynpaw ruh ïa ka sngewskhem ba ka jingpynlong ïa ka lympung kan long kaba seisoh bad kaba jop. “Ngi sngewskhem haba ngi ïohi ïa ki jaka ïalehkai bad katto katne ki jaka sah ba kan long ka Games kaba jop”.
Ha kaba ïadei bad ki jait jingïalehkai ban pynlong ha kane ka National Games kaba 39, ka GTCC ka la pynpaw ba kam pat lah ban pynthikna tad haduh ka rai na ka IOA. Watla katta ruh, na ka liang jong ka jylla ka la buh jingtyrwa haduh 39 tylli ki jait jingïalehkai sha ka Indian Olympic Association (IOA) ba ka kwah ban pynlong.
Na ka liang u Director ka tnad Sports jong ka sorkar Meghalaya, bah Alertson Nongbri, ula ong ba 39 tylli ki jait jingïalehkai la tyrwa sha ka IOA, ha kaba 38 tylli yn pynlong kum ki jingïakop bad kawei (sofball) kan long tang kum ka jingïalehkai pyni nuksa (demonstration sport). Napdeng kine ki jingïalehkai ki don ruh katto katne kiba ym pat ju kham paw hapoh jylla, ba kynthup ïa ka fencing, hockey, handball, kabaddi, netball bad ka rugby.
Shuh shuh ka sorkar jylla ka la tyrwa ban pynlong ïa ka lympung naduh ka 10 haduh ka 30 tarik u Lber, kaba sah sa tang saw bnai, watla ym pat lah ban pynthikna ïa ki tarik ba khatduh. Ka JN Stadium ha Polo kan long ka jaka ban pynlong ïa ka jingïalang plie pyrda ha ka sngi sdang.
Ki katto katne ki jaka ba la thikna ban ïoh pynlong ïa ki jingïakop ki kynthup ïa ka SSA Stadium, Shillong Golf Club, Sports Authority of India centre- NEHU, Wahiajer, Kiang Nangbah Stadium ha Jowai, nangta ki Indoor halls ha Lawsohtun bad Laban. Na ka bynta ki jingïalehkai water sports la pynkhreh ha wah Umiam bad Umtham.
Ki don ruh lai tylli ki jaka ha Tura, watla na ka liang jong ki dkhot jong ka GTCC kim pat shym la ïohlad ban leit jurip hynrei ka Sunaina ka la pyntip ba ka komiti kan dang wan biang sa shi sien ban jurip kumjuh ruh ïa ki jylla ka thaiñ shatei lammihngi ki ban ïoh bynta ban pynlong katto katne ki jingïalehkai jong kane ka lympung.

Kane ka long ka thup jong ki jait jingïalehkai ba la tyrwa da ka jylla sha ka IOA:
Archery, Athletics, Aquatics, Badminton, Basketball, Boxing, Canoeing & Kayaking, Cycling, Fencing, Football, Golf, Gymnastics, Hockey, Handball, Judo, Kabaddi, Kho kho, Karate, Lawn bowls, Modern pentathlon, Netball, Rowing, Rugby, Shooting, Squash, Sailing, Triathlon, Table tennis, Tennis, Taekwondo, Volleyball, Weightlifting, Wrestling, Wushu, Yogasana, Arm wrestling, Muay thai, Sports climbing, Softball (demo).