SHILLONG, Naiwieng 05: Ka Shillong Lajong FC kan khreh ban ïakhun ïa ka jingïalehkai ba nyngkong ha la ïing ha ka Indian Football League (IFL) 2026-27 pyrshah ïa ka Chanmari FC mynta ka sngi Thohdieng (06 tarik Naiwieng) ha SSA Stadium, Polo. Kane ka jingïalehkai kan long ha ka por 6:30 baje janmiet.
ïa kane ka jingïalehkai yn pyni live ha Unite8 Sports bad ka Doordarshan Sports Network, lah ruh ban peit live streaming na ka Waves and Z5 OTT platforms, bad kumjuh ruh ha ka Unite8 YouTube Channel.
Ka Lajong kan jam sha kane ka jingïalehkai hadien ka jingjop da 1-0 kol shabar nala ïing pyrshah ïa ka Mohammedan SC ha ka jingïalehkai ba sdang jong ki ïa ka samoi. Da kaba khur lai point pura ha ka jingïalehkai ba nyngkong, ka Lajong kan kyrmen ban khur ïa ka jingjop ha la ïing bad bteng ïa ka jingsdang ba paka jong ki ïa ka samoi hakhmat ki nongkyrshan.
Haba kren shuwa ka jingïakhun, u Head Coach ka Lajong u Birendra Thapa u la pynpaw ïa ka jingkmen halor ka resol jong ka kynhun kaba mih na ka jingïakhun ba nyngkong bad ka jingkyrmen ha shwa ka jingïalehkai ban wan.
U la pynpaw ba ka Chanmari FC ka dei ka kynhun kaba khlaiñ ha kane ka samoi, khamtam eh haba bishar ïa ki rangïalehkai bar ri ba ka la soi thymmai da kaba don ruh ïa ki nongïalehkai kiba la shemphang bha. U la ban jur ba ka Lajong kan donkam ban phikir bha bad ban wanrah ha madan ïa ka jingïalehkai kaba janai pyrshah ïa ka kynhun kaba khlaiñbor.
U Thapa u la pynpaw ruh ïa ka jingmyntoi haba ïalehkai ha ïing, da kaba pynpaw ba ka kynhun kan shim ïa kane kum ka kabu ban khur ïa ki lai point ryngkat bad ka jingkyrshan jong ki nongpeitkai.
U la pynpaw shuh shuh ïa ka jingsngewskhem ha ki katto katne ki rangïalehkai ba la pynrung dang shen ha ka kynhun, kaba kdew ïa ka jingwan jong ki lai ngut ki nongïalehkai bar ri u Jota, u Joedson bad u Arthur, kiba la khmihlynti ba kin nang pynkhlaiñ ïa ka kynhun katba ka samoi ka dang ïaid shakhmat.
Kane kan dei ruh ka jingïalehkai ba nyngkong jong u Jota uba na Brazil, pyrshah ïa ka klob barim, ka Chanmari FC. Na ka liang jong u Jota, u la pynpaw ïa ka jingkmen jong u halor ka jingïakhun, da kaba kam ïa ka jingsngew ba kyrpang ban ïalehkai pyrshah ïa ka klob kaba u la mihkhmat mynshuwa. Hynrei u la kren shai ba ka jingmut jingpyrkhat jong u ka neh skhem bad ka Lajong, da kaba kular ban ai 100 percent ban ïarap ïa ka kynhun ban khur pura baroh lai poiñ.
Ki Ticket na ka bynta kane ka jingïalehkai lah ban ïoh na: The Electronic Centre – Khyndailad (Police Bazaar), Cafe Shillong – Laitumkhrah; SSA Stadium Ticket Counter – Polo Ground.
