Shillong, Jymmang 04: Ka Balmanduri FC bad ka Iatyllilang Lumsehkot CSC ki la jop ïa la ki jong ki jingïalehkai ha ka lympung 5th Meghalaya State League ba la long hynne ka sngi Nyngkong.
Ha Williamnagar ka Balmanduri FC kaba la pynjemkhnap da 7-1 kol ïa ka Attong Matgrik FC ha ka Group G; katba ka jingïalehkai jong ka Group E ha Wahiajer, la sakhi ïa ka Iatyllilang Lumsehkot CSC kaba la khur ïa ka jingjop kaba nyngkong ha ka MSL, da kaba pynliem 2-1 kol ïa ka Lumphyrnai Sohphoh FC.
Na ka bynta ka Balmanduri, ka jingmih ka la long kumjuh kumba la jia ha ka jingïalehkai ba nyngkong (1st leg), ha kaba ka la jop da kajuh ka jingkheiñ pyrshah ïa ka Attong Matgrik kaba don shatrai duh jong ka Group.
U Chichang M Momin (20′, 27′, 50′, 87′) u la pynkhihjar ar sien ha baroh ar kylla jong ka jingïalehkai, katba u Ltchal Marak (36′, 66′) bad u Withnias G Momin (90′) ki la thep ïa kiwei pat ki kol na ka bynta ka Balmanduri. U Sunil M Marak (58′) u la thep ïa ka shi kol na ka bynta ka Attong Matgrik.
Ha Wahiajer, ka Iatyllilang Lumsehkot, kaba la thep tang shi kol ha ki saw tylli ki jingïalehkai ba la dep, ka la ïoh ban pynkhihjar ar sien lyngba u Leiwanki Laban (9′) bad u Firstborn Tyngkan (22′) hynne ka sngi. U Sonowel Kharsati (79′) u la pynphai shi kol ha ka kylla miet hynrei kam shym la biang ïa ka Lumphyrnai Sohphoh ban lait na ka jingshah rem.
Da kane ka jingjop ka Iatyllilang Lumsehkot ka la lah ban pynkynriah noh ïalade na ka kyrdan ba sha trai duh jong ka Group E hynrei kam don jingkyrmen shuh ban ïoh jaka ha ka pre-quarterfinal wat shuwa kane ka jingïakhun namar ba ka Shillong Lajong bad ka Lumphyrnai Sohphoh ki la dep ban pynthikna ïa baroh ar tylli ki jaka hapdeng jong ki.
