Kynjah jar ki trok kit maw tang shu ïoh jingtip ba jurip kynsan ka HNYF ïa ka Weighbridge ha Killing

Nongpoh, Naiwieng 26: Ka weighbridge (Khyrdop) kaba don ha ka shnong Killing ha Ri Bhoi District ha ka sngi Baar ka la kynjah hi jar tang hadien ba ki dkhot jong ka HNYF Northern Region ki la hiar jurip kynsan hadien ba la ïoh jingtip ba ka don ka jingkit beaiñ ïa ki maw, ki shyiap bad kiwei kiwei ki mar poh khyndew khlem ki kot ki sla.
Ha ka jingjurip ki dkhot ka seng ki la lyngngoh ba kim shym la lap shuh wat tang kawei ka trok kit mar katba ha kiwei ki sngi pat ki ïaid sahuh na ka khyrdop bad na surok.
Shwa ban poi ki dkhot ka HNYF, ki Pulit na Khanapara Police Station bad ki Pulit CRPF ki la don lypa ban pahara ïa ka khyrdop khnang ban ym mih kano kano ka huri hura kaba ktah ïa ka shongsuk shongsaiñ.
Haba kren sha ki lad pathai khubor u President jong ka HNYF Northern Region u Bah Hesting Lyngdoh bad u Secretary u Bah Alfred Malai ki la ïathuh ba jinghiar jurip ka long halor ka nongrim ba ki la ïoh jingtip ba ka don ka jingshalan beaiñ ïa ki marpoh khyndew na katei ka thaiñ bad dei namar kane ka daw la pynlong ïa ka seng ban jurip ban lap ïa ka jingshisha halor ka jingtreikam hapoh katei ka khyrdop lum pisa ka sorkar.
Ki la ong ruh kaba sngewlyngngoh ka long ba tang mar ïa wan jurip ka seng la kynjah ka surok bad ym don shuh ki trok kit maw ne kit khyndew kiba wan na katei ka khyrdop bad kane ka paw shai ba ka don ka jingleh beaiñ ban shalan tuh ïa ki marpoh khyndew kiba wan na katei ka thaiñ Killing ban shalan beaiñ sha ka jylla Assam.
Ki la ong ruh ba kim tuklar ïa kano kano ka kam kamai kiwei, hynrei ki kwah tang ba pynthikna ba ka jingmih ki marpoh khyndew na katei ka thaiñ ka dei ban ai jingmyntoi ïa ka sorkar bad ym ban shu shalan beaiñ khlem kot khlem sla sha ka jylla Assam.
Ha kawei ka bynta ki la pynpaw ruh ïa ka jingsngewkhia ba na ka daw ka jingtih khyndew ka jingtih maw ka la pynjot lut ïa ki lum ki wah bad ïa ka mei mariang bad lada kam don pat kano kano ka jingïoh jingmyntoi ka sorkar ban lum khajna ka jingdon katei ka khyrdop kam don jingmyntoi ei ei, ki la ong.
Ki la pynthikna ruh ba ka seng ha kane ka sienjam kan shu wan ban jurip tang ban lap ïa ki jingshisha bad kum ka seng kan dang buddien ruh nangne shakhmat, ha kaba ladap lap ba ki don ki kam beaiñ ban shalan ïa ki marpoh khyndew na katei ka thaiñ ka seng kam banse ban shim da kiwei ki lad ki lynti kiba dei katkum ki lynti ka aiñ, la bynrap kitei ki nongïalam ka HNYF na Ri Bhoi District.