Shillong, Naiwieng, 26: Palat 500 ngut ki samla ki la thep kyrteng na ka bynta ban ïakhun ïa ka elekshon ha ki kam bapher bapher jong ka Indian Youth Congress ha Meghalaya.
Ha u kyrwoh ba la phah ha ka sngi Baar, u Election Coordinator jong ka Meghalaya Pradesh Youth Congress (MPYC) u Bah Banphira Basaïawmoit u la ong, “ha ka jingrakhe ïa ka jingpyntreikam ka synshar paidbah kaba heh tam hapdeng ki samla jong ka ri, ka Indian Youth Congress ka dang bteng ïa ka jingkular jong ka ban pynlong ïa ka rukom jied nongkitkam kaba khuid jong ka Youth Congress ha Meghalaya.”
U la pyntip ba ki la pyndep ïa ka jingthep kyrteng na ka bynta ka kam State President, General Secretary bad kiwei kiwei ki kyrdan nongkitkam. Nalor kata, la sdang ruh ban thep kyrteng na ka bynta ki nongkitkam bapher bapher ha ka kyrdan distrik.
“Ngi sngewkmen ban pynbna ba palat 500 ngut ki samla ki la thep kyrteng na ka bynta ki kam bapher bapher ba la pynkut hynnin ka Lah Sngi u Blei lyngba ka online registration system jong ka Indian Youth Congress, kata, da ka “With IYC” app, kaba lah ban ïoh ha ki Android bad rynsan iOS,” ong u Bah Basaïawmoit.
“Ngi pynpaw ïa ka jingsngewnguh sha baroh ki samla kiba la ïashim bynta ha kane ka kam. Ngi pynshlur ruh ïa ki samla ha kylleng ka jylla ban jied ïa u President ka jylla bad kiwei kiwei ki District President da kaba pyndonkam ïa kajuh ka App. Kane ka dei ka kabu kaba kordor ban trei shitom ïashim bynta ha ka rukom synshar paidbah bad long shi bynta jong kane ka jingïakhih kaba pynkylla dur,” u la ong haba pyntip ba ka tarik ba khatduh ban thep vote kan long ha ka 16 tarik, Nohprah, 2024.
“Ka long shisha u jingsah kynmaw ban ïoh ïa kum kine ki jingai kyrteng kiba bun na ka bynta ka jingthep kyrteng, kaba pyni shai ïa ka lynnong kaba thymmai ha ka jingïatreilang jong ki samla ka jylla Meghalaya ha ka synshar paidbah,” la ong u Bah Basaïawmoit.
