Plie u Myntri ïa ka Green Force Patharkhmah ban pynkylla dur ïaka thaiñ

Nongpoh, Jymmang 01: Kum ka thong ban wanrah ïaka khuid ka suba bad ban pynkylla dur ïaka thaiñ Patharkhmah kum kawei naki jaka kaba lait naka jingjaboh bad ka jaka kaba pynneh pynsah bad sumar ïaka mei mariang, ka ophis u ka ophis jong u SDO Patharkhmah Civil Sub-Division, ha ka jingïatreilang bad ka ophis u Deputy Commissioner ka Ri-Bhoi District lem bad ka Meghalaya Basin Management Agency (MBMA), mynta ka sngi ki la pynlait paidbah ïa kawei ka prokram ba la tip kum ka Green Force Patharkhmah.
Ïa ka jingïalang ban pynlait paidbah ban sdang ïa katei ka thong la pynlong ha Patharkhmah Community Hall bad la wan ban plie paidbah da u Bah Sosthenes Sohtun Myntri ka sorkar jylla ba dei ruh u MLA ka Jirang kum u kongsan haka jingdonlang u Chaitanya Awasthi, SDO ka Patharkhmah Civil Sub Division, u Bah Petal Thangkiew, Rangbah Shnong Patharkhmah, u samla Bahbok Wahlang, President ka Patharkhmah Youth Club & Social Welfare Organisation, lem bad kiwei kiwei ki riew rangbah bad ki nongïalam shnong.
Ka thong jong kane ka Green Force Patharkhmah ka long ban wanrah ïaka khuid ka suba ha katei ka thaiñ ban sumar ïa ka mei mariang, naduh ki wah bad ki sawdong sawkun ban pynkylla dur ïa katei ka thaiñ ban long ruh ka jinghikai ïa iwei pa iwei ba ka khuid ka suba ka long kaba kongsan naduh ka jingitynnad bad ka koit ka khiah, hynrei ka jingpynjaboh ïaka mei mariang ka dei ka kam beaiñ ha kaba kin don ruh ki khmat ki ban peitngor bad peit pyrman ïaki briew kiba pynkheiñ aiñ kin ngat haka kuna bad ka jingshah pynshitom bad lyngba ka Iatreilang Inter Village Development Championship kan pynkhlaiñ ïa ka jingïatreilang hapdeng ki shnong, ban sumar ïa ki wah, bad ban wanrah ïa ka jingkhuid ha ka imlang sahlang.
Ha kane ka sngi la sam ruh ïaki tiar pynkhuid naduh ki juti, ki jingsopkti, ban pyndonkam haka jingpynkhuid ïaki sawdong sawkun bad ha katei ka juh ka sngi la pynlong ruh ïaka jingpynkhuid ïaka madan phutbol, ki rud ki kiar da ka jingshim bynta lang u Myntri lem bad ki ophisar bad ki paidbah nongshong shnong.
Haba kren ha kane ka sngi naka liang u Bah Sosthenes Sohtun u la ong ba ka jingïatreilang ha kano kano ka kam ka long kaba kongsan ban pynurlong bad ban kynjoh sha ka thong bad kane ka Green Force Patharkhmah kan nym urlong lada ki paidbah naduh ki samla, ki longkmie longkpa kim ai ka jingïatreilang ryngkat ka jingkyntu ïaki paidbah ba ki dei ban ai ka kti kamon ka ka diang ban pynurlong ïa kane ka thong.
U la ong ruh kan myntoi aiu ban ioh ïaka spah pyrthei hynrei ngi duh noh ïa ka khuid ka suba bad ka jingiwbih ka mei mariang, kumta ngi donkam ban sumar khuid bad ban sdang nala rympei ba sa shisien ngin lah ban pynitynnad biang ïaka mei mariang ryngkat ka khuid ka suba khlem da bret pathar ïa ki jaboh jabaiñ.