Pyrshah jur ka JYF-EJHD ïa ki project ka company Shree Cement Ltd ha Elaka Nongkhlieh

Khliehriat, Jymmang 01: Ka Jaiñtia Youth Federation, East Jaiñtia Hills ba la lamkhmat da u President, u Bah J. Pala bad u General Secretary, u Bah B. Chyrmang lyngba ka jingthoh ba la buh hakhmat u Member Secretary jong ka tnat Meghalaya State Pollution Control Board ka pynpaw ïa ka jingpyrshah jur halor ka jingthmu ka company Shree Cement Ltd ban shna ïa ki project bapher bapher namar ki project kiba la company ka thmu kin ktah jur ïa ka jignglong jingman ka mariang ha ka thaiñ Nongkhlieh.
Katkum ka shithi, ka Jaiñtia Youth Federation ka ong ba ka seng ka pyrshah jur ïa ka jingthmu ka Shree Cement ban khlong ïa u mawshun na ka par kaba don ha Lum Shyrman kaba don ka jingeh kaba haduh 217.794 hectare, ka pyrshah ruh ïa ka jingthmu ka company ban shna ïa ka primary bad secondary crusher ha Lum Shyrman, elaka Nongkhlieh, ka seng ka ong ba lada ailad ïa ka company ban shna ïa ki project baheh-baheh kan sa don beit ka jingpom dieng pathar, kan sa jakhlia lut ki um ki wah, kumjuh ruh ki tyllong um bam um dih kiba don ha ka thaiñ bad kan pynjakhlia ruh ka lyer ba ring mynsiem, kine baroh kin ktah ïa ka koit ka khiah jong ki paidbah khamtam ki khyllung khynnah bad ki tymmen kiba shong ba sah ha ka thaiñ Nongkhlieh, shuh shuh kan ktah ruh ïa ki mrad kiba im ha ki khlaw ki btap hapoh ka mariang.
Ka seng ka ong ba lada shah ktah ki um, ki wah bad ki tyllong um khlem pep kan ktah ruh ïa ka rep ka riang jong ki paidba namar ki paidbah ki dei kiba im da ka rep ka riang bad kan wanrah ïa ka jingduna um ha ka thaiñ.
“Lada ailad ban shna ïa ki project jong ka Shree Cement Ltd kan wanrah ka jingjulor ki jaka rep ba ki paidbah ki ju rep ju riang, ka long kaei kaei kaba sngewsih bad sngewkhia ba kiba kum kine ki project jong ki karkhana kiba lah don ha East Jaiñtia Hills District kiba la paw shynna ba ka la don ka jingshah ktah ka mariang bad ka rep ka riang, te lada ailad sa ïa kane kan sa nang khan sniew shuh shuh” pynpaw ka JYF.
Shuh shuh ka seng ka ong ba wat ki briew kiba na ka thaiñ Elaka Nongkhlieh ruh ki pyrshah jur ïa ki project bad jingthmu ka Shree Cement bad lada ailad ban jingpyntrei ïa ki project ba kin ïaid shakhmat ka lah long ka jingïuhroit ïa ka hok jong ki nongshong shnong kumta na ka liang ka Jaiñtia Youth Federation East Jaiñtia Hills District ka dawa na ka tnat MSPCB ba ka dei ban pyndam noh shi syndon ïa ki jingthmu ka Shree Cement bad pyntrei ïa ki project ha Lum Shyrman ha Elaka Nongkhlieh bad dawa ruh na ka MSPCB ba ka dei ban shim ïa ki synjam ban ïada ïa ka mariang, ïada ïa ki hok jong ki briew ka thaiñ, ban pyrkhat ïa ka koit ka khiah, ka bha ka miat jong ki paidbah.