Tang 2 miter na ka Wah Myntdu lap ïa ki tyndong lum snam
La ïap ka jingsngew ki briew ïa ka Wah Myntdu' ong u ma K.L. Pariat
Jowai, Jymmang 01: Hadien ba la lap ïa ki tyndong lum snam ba la dep test ïa kiba la leit bret pathar harud jong ka Wah Myntdu ha ki bynta ka dam sier, naka liang u ma Khroo L. Pariat haba pynsngew ïa kane da kaba ong “la ïap ka jingsngew jong ki briew ïa ka Wah Myntdu”.
Ula ong hynnin ka sngi ula ïoh jingtip ïa kane na ki nongleit khwai kiba la lap ïa kitei ki tyndong lum snam kiba la don snam tang 2 miter na ka Wah Myntdu, donbok lada ka wan ka um heh la tikna ba kitei ki tyndong kila shah kit lut sha ki bynta ka Wah Myntdu kaba dei ka nongbsa um bam umdih.
Halor kane u ma K.L. Pariat ula ong mar ïa ïoh jingtip ïa kane kila ujor sha u Dr. G. H. Chyrmang, MFS uba dei u Member Secretary ka MSPCB bad mynta hi ka sngi Thohdieng ki briew jong katei ka tnad bad u Engineer ka Jowai Municipal Board kila wan ban jurip ïa kane ka ‘dam sier’. Na ka liang ka tnad Municipal kala pyntip ba kan phah pynlum pyllang ïa kitei ki tyngdong khnang ban ïoh leh ïa kaba donkam.
Hynrei kaba sngewsih shuh shuh ka long ba kitei ki nongleit bret pathar ïa ki tyndong lum snam kim don shuh ka jingsngew wat ïa ka koit ka khiah, ïaki dohum dohwah bad kumjuh ïa ka mariang, ‘kat kiba donkti ïa kane ka kam ki dei ban wan mih shakhmat bad shim ka jingkitkhlieh namar la don ka jingsuba jur ïa kiba donkti, ong u ma Pariat, lada kim wan shakhmat ki lah ban shah pynshitom tyngeh katkum ki kyndon aiñ.
Shuh shuh ula ong kum kine ki jingjia kim dei ban jia shuh nangne shakhmat, kumta kaba donkam ka dei ban don ka jingïatreilang, namar mynta wat na ka liang ki bor pynïaid District bad ka District Council kim shem la peit shuh ïa kane ka jingeh jong ka Wah Myntdu.
Kumba long mynta wat ka Wah Myntdu kala dap da kyndew suda bad kala pynstang ïa ka wah ha baroh shi lynter, ula kyntu ruh ïa ki briew kiba leit siat jaiñ sha ki bynta ka Wah ba kim dei ban leit bret ïa ki jakhlia jakhlait sha ki bynta ka Wah Myntdu.
Ha ka juh ka por ula kyntu ïa u MLA ka thaiñ, U Deputy Commissioner, ka District Council, ka tnad Water Resources ba kin wad ïa ki lad ki lynti ban pynshan ïa ki jaka saitjaiñ bad ban pynlum pynlang ïa ki jaboh shi jaka.