Nongpoh, Jymmang 02: Kawei ka kali Ambulance jong ka Seng Samla Mawlai Pyllun kala kylla lyndang hynne ka step hapdeng sor Nongpoh katba ka dang thmu ban leit buh ïaka metiap jong uwei u rangbah u ba la khlad noh namar ka jingshitom na jaka sumar ha NEIGRIHMS.
Katkum ka jingtip bala ioh lum la ong ba kane ka jingjia kala jia hynne ka step haka por kumba 6 baje eiei ha kaba katei ka kali Ambulance Eeco bala ñiah da u Bah Rishan Kharmyndai kaba don ïa u number ML 05 X 8518 ka dang mih na NEIGRIHMS ban leit buh ïa katei ka metiap sha West Garo Hills, hynrei namar ka jingpynsted katei ka kali kala kylla lyndang beit hapdeng surok bah bad katto katne ngut kiba shong hapoh katei ka ambulance kila mynsaw malu mala.
Naka liang ki pulit ka Nongpoh Traffic mar mar kila poi sha katei ka jaka ban pynlong ka jingtohkit bad la rah noh ïa kitei kiba mynsaw sha Nongpoh Civil Hospital naka bynta ka jingsumar, katba ïa katei ka metiap la buh ha jaka buh metiap ha katei ka Hospital, bad ka jingtohkit halor kane ka jingjia ka dang ïaid shakhmat.
