Shillong, Naiwieng 20 : U President ka NPP hapoh ka jylla u Dr W.R Kharlukhi ula kyntait ba ka don ka jingïapher jngmut hapoh ka party halor ka Citizenship Amendment Act (CAA).
“ Ym don ka jingïapher jingmut hapoh ka NPP halor kane ka CAA. Ka jingkren jong ka MP ka Agatha Sangma kam mut satia ba dei ka jingkren jongka party. Nga dei u President jongka party ha ka jylla nga sngewthuh shai halor ka nongrim ba ka ïeng hynrei kum ka party ngi ïeng ha ka nongrim kata ba ngim pat ju kyrshan ïaka CAA” ong u Dr Kharlukhi.
ïa kane ula ong haba u jubab ïa ka jingkylli hato ka don ne em ka jingïapher hapoh ka NPP namar ka MP jongka Lok Sabha ka Agatha Sangma ka kyrshan ïa ka CAA ha Parliament katba ka NPP pat ka pynpaw ba kam kyrshan ïa ka CAA.
U Dr Kharlukhi u la pynkynmaw ruh ba ka jingpynsangeh ban pyntreikam ïaka CAA ka dei hadien ba u myntri rangbah u Conrad K Sangma u la lum da ka jingïalang jong ki myntri rangbah kane ka thaiñ ban ïakren halor ka CAA.
Haba la kylli kiei ki lad kiba ka NPP kan shim ban pynthikna ba yn weng pura ïaka CAA ha ka jylla Meghalaya une u nongïalam ka NPP u la ong “ Ngi pyrshang ïa kaba bha tam hynrei kaei kaba ngi donkam ka long ka jingïatrei lang bad jigkyrshan jong ki paid kane ka thaiñ ka ban pynsngew ïaki shkor ka Delhi ba kin ym pyntreikam ïa ka CAA bad ka dei kane kaba ka NPP ka pyrshang ban wanrah ïa ka jingiatylli bad jingïatrei lang jong baroh”.
