Wat tieng wat syier ïa u COVID, tangba kynmaw ban ïada : CM

0

Shillong, Nohprah 22 : U Myntri Rangbah ka jylla, Conrad K Sangma u la kyntu ïa ki paidbah ba kin rakhe ïa ka Kristmas bad ka Snem Thymmai khlem kano kano ka jingsyier ne jingtieng ïa ka khlam COVID hynrei u la ai jingmut pat ba kin long kiba adkar bad ïada ïalade haba ki leit shim bynta ha kitei ki jinglehkmen.
Haba kren bad ki lad pathai khubor hadien ba la wai ka jingïalang buddien halor ka jinglong jingman jong ka khlam COVID ha ka jylla, u Myntri Rangbah u la ong, “Kane ka jingïalang buddien halor ka khlam COVID kadei shi bynta jong ka jinglong jingman ha ka pyrthei baroh kawei bad ha kane ka sngi u Myntri Rangbahduh ka Ri ruh u lum ïa kane ka jingïalang kum shi bynta ka jingïada ha shwa ba ngin leit sha ka shuti Kristmas.”
U Myntri Rangbah u la ong ruh ba ha ka jingïalang ki lap ba ka jinglong jingman kam don kano kano ka jingsyier ne jingtieng bad ba ki paidbah kim dei satia ban don ka jingsyier jingtieng. “Tad haduh mynta ka jingtest ka dang ïai bteng kylleng hynrei ka jingdon ki briew kiba ïoh thymmai ka la duna haduh katta katta 0.002 persen lane kumba 0.005 persen. Kumta kam don satia kano kano ka jingtieng ïa ka khlam,” u la bynrap shuh shuh.
Hynrei u la ong pat kum ka sorkar kam dei satia ban kheiñsting hynrei ban long barabor kiba la pynkhreh bad peitngor ïa ka jinglong jingman. “Hynrei ha kum kane ka samoi lehkmen ka long kaba sngewdei ba ki paidbah kin deng ïa ki mask ban ïada ïalade bad ïa baroh.”

Leave A Reply

Your email address will not be published.