Shillong, Nohprah, 22: U MDC jong Tura u Bernard N. Marak ha ka sngi Balang u la dawa ïa u Myntri Rangbah ka Jylla u Conrad K. Sangma ban pyllait noh ïa ka Pradhan Mantri Awas Yojana (PMAY) bad ïa kiwei kiwei ki skhim kiba la mang da ka Sorkar Pdeng sha ki nongïoh bhah.
“Ka long ka bym dei ban pynduh ïa ka hok jong kiba duk kiba dei ban ïoh pdiang ïa ki skhim jong u Modi kumba u la pynbna paidbah lyngba ki lad pathai khubor bad ha ka jingai jingkren ha ka Mann ki Baat,” u la ong.
“Ki paidbah ki tip bniah ïa kine ki skhim hynrei balei kim poi sha ki paidbah kata ka dei u dak jingkylli uba heh,” u la bynrap.
Dang ha ka Sngi U Blei, u Myntri Rangbah u dang ïaroh ïa ka jingshimkhia jong u Narendra Modi ha ka jingwan iuhkjat ha nongbah Shillong bad mynta ngi khmihlynti ba u Myntri Rangbah un pynurlong ïa ka jingangnud jong u Modi ban sam ïa ka bhah kaba dei hok jong kiba duk, ong shuh shuh u Marak.
U la bynrap, ka jingbym pyllait ïa ka pisa PMAY sha ki nongïoh bhah tang na ka daw ba ka don ïa ka dur jong u Modi halor ka jingkynnoh ba ka BJP ka pyrshang ban khroh vote ka long ka jingkynnoh bym shongnia bad ka jingai jingtip kaba bakla sha ki nongïoh bhah ba u Modi u la knieh noh ïa ka hok bad tang lada ki ai vote ïa ka NPP yn sa pyllait ïa ka pisa.
“Lada kum kine ki jingjia kin wan jia, ki paidbah ki dei ban ujor sha ki ophis treikam jong ka BJP,” la kyntu u Marak.
“Kane ka dei ka bamsap kaba shyrkhei jong ki paralok kiba ïatreilang hapoh ka Kynhun Meghalaya Democratic Alliance (MDA). Ka jingtynrah nadien ïa ki nongïalam ka BJP ka dang ïai bteng bad ngi dawa ba dei ban pyllait noh mardor ïa ka bhah pisa sha ki paidbah kiba dei hok ban ïoh jingmyntoi,” ong shuh shuh u Marak.
