Pynïoh tiar seng kam u CEO ka NeIPS ïa ki samla ba la shah pyntbit ha ka NeIPS

0

Shillong, Nohprah, 22: Ka Northeast Institute of Professional Studies (NeIPS) East Khasi Hills District ha ka Lah Sngi U Blei ka la sam ïa ki tiar shna Mobile sha ki 100 ngut ki samla kiba la pyndep ïa ki jinghikai pyntbit shna Mobile Phone kum shi bynta ban pynshlur ïa ki ban sengkam lajong.
Ha kane ka sngi ka Administrative Officer jong ka MSSDS ka Kong Masarsuk Tariang ka la long ka kongsan bad ka SDO jong ka MSSDS ka Kong Audrey M. Khonglam ka la long kum ka Symbud Kongsan ha ryngkat ka jingïadonlang jong u Michael Thongni uba dei u khliehduh bad u trai jong ka NeIPS kaba dei kawei na ki shlem ai jinghikai ban sengkam lajong ïa ki samla ka thaiñ.
Ka Kong Masarsuk Tariang haba kren kum ka Kongsan ka la ïaroh ïa ka jingtrei shitom jong u Bah Michael Thongni uba len lade ban kyntiew ïa ki lad kamai jong ki khun samla ka thaiñ lyngba kane ka shlem ai jinghikai NeIPS bad la pynsngew ruh ba u long u samla u ba ïohi jngai na bynta ban kyntiew ïa ka jylla ha bun ki liang da kaba u ju leit manla ka por sha ka ophis treikam jong ka ban pynsngew ba ki khun samla kin ïoh ïa ka jingkyrshan na ka Sorkar.
Ha u bnai Ïaiong, 2022 ka la ong ba ka Sorkar lyngba ka MSSDS ka la pynmih ïa ka project SKILLS MEGHALAYA ban ïarap kyrpang ïa ki khun samla ban ai jinghikai pyntbit ha ki laiñ bapher bapher lyngba ka Institution kum ka NeIPS.
Ka la kyntu ruh ïa ki samla kiba la shim ïa ka jingshah hikai pyntbit ba ki dei ban pyndonkam hok ïa ka sap kaba ki la dep shah pyntbit namar kan long ka jingkyrkhu ïa ka lawei jong ki bad ka la ong ruh ba ka jingïaishah ka dei kawei na ki lynti ban ai jingjop ban poi sha kliar jong ka thong, namar haba ki ïoh ïa ki tiar ki lah ban sdang kam da kaba shong ha ïing bad pynkhlaiñ ïa ka jingpyntip ban treikam lyngba ki kor Internet ka juk mynta.
U Michael Thongni ha ka jingkren u la ong ba u dei uwei na ki nonghikai ha kawei na ki skul bah ha ka jylla Kerela bad u la iehnoh ïa ka kam namar u angnud ban don ha jylla la jong ban leh eiei na ka bynta ki khun samla halor ka jingkyrduh kam, kumta u la shim ïa ka sienjam bad thong ka long ban leh eiei na bynta ban ïakhun pyrshah ïa ka jingkyrduh kam hapdeng ki khun samla bad dei ha ka snem 2014 da i bor barit u la sdang shakri na Nongstoiñ bad mynta u la don ha kylleng ki District ka jylla Meghalaya lyngba kane ka shlem ka kylla long ka jingkyrmen ïa shibun ki khun samla.
U la ong haba u ïaid ïa kane ka kam treimon sngewbha kam dei kaba suk watla ki jingeh bad ki shiah ba thar kim dei ban pynduh mynsiem hynrei ki long pynban ki maw jingkieng ba nga lah ban kyntiew na bynta ka jingbha ha ka imlang sahlang
U la ong ba ki samla ki long kum ki symbai namar ka imlang sahlang ka kyrmen bad shaniah ha ki ïa ka lashai.
“Kumta to jied ïa ka nam babha ban long nuksa ïa kiwei ki para samla bad u la kyntu ïa ki samla bakim dei ban ap khmih lynti tang ïa ki kam Sorkar hynrei ngi dei ban long ki samla kiba lah ban thaw kam ruh na lade lyngba ki sap ba la dep hikai khnang ba kan long ka jingkyrkhu ïa kiwei pat bad u la pynkut da kaba ong, haba skhem ki samla, skhem ka lawei ka jylla,” la ong u Bah Michael.

Leave A Reply

Your email address will not be published.