Shillong, Nohprah, 22: U State President ka BJP u Bah Ernest Mawrie ha ka sngi Palei ula takraiñ tyngeh bad pynrem jur ïa u nongïalam ka Trimamool Congress u Kirti Azad uba la kren beiñ bad kren poh ïa u Myntri Rangbahduh ka ri u Narendra Modi uba la phong ïa ka riam Khasi ha ka jingwan iuhkjat ha nongbah Shillong ha ka Sngi u Blei mynta ka taiew.
“U Nongïalam ka Trinamool Congress u Kriti Azad u la pyndonkam da ki ktien ba pynpohdor ïa ka riam Khasi, kaba u Myntri Rangbahduh ka ri jong ngi u la phong da ka jingsngew sarong,” ong u Bah Mawrie.
U Bah Mawrie u la ong, kane ka jingkynthoh ka pynpaw ïa ka dur ba shisha jong ki nongïalam jong ka TMC pyrshah ïa ki riewlum ka jylla bad ïa ki riewlum ha ka ri baroh kawei.
U la ong ba ka TMC ka dei ka party kaba peit tang ïa ki menriewspah bad kaba ñiew shiliang ïa kiba rit baria. “Ka jingkynthoh ka pynpaw shai ba kumno kane ka seng saiñpyrthei na ka jylla West Bengal ka pyrkhat ïa ka jylla Meghalaya, ïa ki nongshong shnong bad ïa ka kolshor jong ki,” u la bynrap.
U Bah Mawrie ula kyntu ïa ki nongïalam ka Jylla kiba la pynïasoh ïalade bad ka BJP ba kin peit ïa ki jingshisha shaphang ka jingthmu ba shisha jong ka party jongk i.
“Ki paidbah ka Jylla Meghalaya kin ym pdiang satia ïa ka TMC lano lano ruh,” u la ong.
