Ka kyrduh kam ka pyndiaw ïa ngi ki samla watla ka Meghalaya ka la dap 50 snem: UDP Youth Wing

0

Shillong, Nohprah, 22: Kum shi bynta ka jingpynkhreh ïa ka Elekshon sha ka ïingdorbar Thawaiñ ka jylla ka ban sa long ha u snem 2023, ka United Democratic Party (UDP) Youth Wing, Mawkynrew Circle ha ka sngi Balang ka la pynlong ïa ka jingïakynduh lang jong ki para samla ha kaba ki la pynpaw ïa ka jingsngew diaw watla ka jylla Meghalaya ka la kynjoh sha u mawmer ba 50 snem ka jingïoh ïa ka jylla ba pura, phewse ka thaiñ Mawkynrew ka dang sahdien ha kiba bun ki liang.
Ha kane ka General Meeting ba la pynlong ha ka shnong Maw U Sam ki nongkitkam na ki sub circle bapher bapher kiba don hapoh ka Mawkynrew Constituency ki la wan ban ïashim bynta ha kaba la sakhi lang da u kyrtong jong ka UDP na Mawkynrew Constituency u Bah Remington Pyngrope lem bad u MDC ka Langkyrdem u Bah Ryngkatlang Lyndem.
Ki nongïalam ka UDP na ki Sub-circle bapher bapher haba ai jingkren ki la pynpaw ïa ka jingbynniaw halor ka jingud jingnam jong ki khun samla ki bym ïohkam ïohjam ka pynlong ïa ka UDP ban don da kawei ka thong ba hakhmat eh kata ka dei ban kyntiew ïa ki para samla, ban kyntiew para nongshnong jong ka dong bad ka thaiñ baroh kawei kaba hap hapoh ka Mawkynrew Constituency.
Shuh shuh ki la bynrap ba ki samla ki dei ki lawei hynrei ha kane ka juk ba mynta ki para samla ki dei ruh na ka bynta ka mynta namarba lada ki samla kiba dang shait dang khlain lada kim leh noh mynta lano kin trei pat bad buh ruh ka jingkylli la kin trei da ki lah tymmen!?.
Ka President jong ka Jatah Sub-Circle ka samla Dakmenlang Mynsong haba kren ha ka jingïalang ka la pynpaw ba kum ka samla kaba la sakhi ïa kiba bun ki jingeh ba ki samla ki ïakynduh bad la donkam ban jied ïa ka seng kaba lah ban pynurlong ïa ki jingthmu namar kata ka daw ka lah pynlong ïa nga ban ïaid ha ka jylli jong ka saiñpyrthei bad la jied ban rung ha ka seng UDP ban ïarap ban pynduna ïa ki jingeh jong ki samla bad ban ïoh ruh ïa u nongïalam uba dei u khasi.
U President ka Youth Wing Mawkynrew Circle u Samla Brington Suting u la bynrap da kaba ong, ba u la shimti kum u President ka Youth Wing Mawkynrew Circle ka dei ban ïalam lang ïa kiwei pat ki para samla ban lum thup ïa ki ban lah ban trei na ka bynta ka dong ka thaiñ bad bynrap ruh ba dei hadien kata ka mat ba kin sa lah ban rai da kawei ka jingmut ba ha kano ka bynta bad ha kaei ka jaka ba kin sa lah ban tur shakhmat.
U la ong ba ha kano kano ka bynta ne kino kino ki thaiñ jong ka ri India ne ka pyrthei baroh kawei, khlem ka politk yn ym lah ban ïaid sha khmat lada don shisha ka jingthmu kaba bha bad ban kyntiew ïa ka dong ka thaiñ, khlm da don ha ka politik ne ka saiñhima sima ngin nym lah ban tur ne ban ïaid shakhmat ne ka lynti ban pynurlong ïa ki jingthmu kum u samla bad dei ruh namar kane ka daw u la shim ïa ka seinjam ban tur, ban ïaid shakhmat ban rung ha ka seng UDP namarba ka seng UDP ka dei ka seng rilum bad ka dei ruh ka seng rilum ka baheh hapoh ka jylla Meghalaya.
U MDC ka Langkyrdem u Bah Ryngkat Lyndem uba dei ruh u President ka UDP East Khasi Hills District, haba kren ha ka jingïalang u la pynpaw ba kum u dkhot jong ka seng UDP kaba dei ka party riewlum. U da thrang ruh ba ka sengriew lum kan bat ïa u lakam shynshar bad ki para-doh para-snam kin ïohi ïa ka shynshar jong ka party riewlum bad kum u nongïalam bad nongtrei jong ka party UDP u ju buh ka jingkylli hato don neem ki nongtrei kiba skhem, ki nongtrei kiba ieid ïa ka party riewlum bad ki nongtrei ki bym kynriah bad ki nongtrei ki bym shah thied.
Shuh shuh u Bah Ryngkatlang u lah ong ba u don jingkyrmen ba ka party UDP kan jop ha u 2023 bad ka seng ka dei ruh ban jop na ka thaiñ Mawkynrew bad na kiwei ki thaiñ marjan bad kyntu ruh ïa ki para nongtrei kam bad nongïalam jong ka party ban long kiba trei shitom bad kiba don ka jingmut kaba skhem ban dup lah ban pynjop ïa u kyrtong jong ka seng uba ieng na ka Mawkynrew Constituency.
U kyrtong ka UDP na Mawkynrew u Bah Remington Pyngrope haba kren ha ka jingïalang u la ong tang kawei ka thong ba un buh kata shiteng na ka MLA skhim ngan buh kyrpang tang na ka bynta ki khun samla ba kumno kin wanrah ïa kata ka roi ka par, ka ïoh ka kot hapoh ka dong ka thain jong ka Mawkynrew Constituency baroh kawei.
U la ong ba ka jingdon bynta lang jong ki khun samla ka ai mynsiem shi katdei eh, ym dei tang shisien san snem ban pyn sngewtynnad ïa ki khun samla tang shi sien san snem shwa ka election bad to kyrmen da kaba skhem bad trei shitom ba ngin ïoh kheit ïa u soh jong ka jingjop ha u 2023 bad ngin ïa don lang ryngkat katba u Blei u dang ibit ban kit ïa ka lyngkor jong u paidbah.
Ha kane kajuh ka sngi u Bah Remington Pyngrope kum shi bynta ban sei ïa ki sap ba kyrpang jong ki khun samla u la plie paidbah ruh ïa ka SEI LA I SAP kaba long kum ka lad ba ki khun samla kin ïoh ïa ka lad ban pyni ïa ki sap ki phong ka ban kut haduh u bnai Rymphang, ha kaba ki la don haduh 70 ngut ki samla na ki shnong bapher bapher jong ka Mawkynrew kiba la ïashim bynta.

Leave A Reply

Your email address will not be published.