Wan u Bah Ardent ha Mawkyrwat ban pynshai ïa ka Reservation, pan jingkyrshan ïa ka 12 tarik

Mawkyrwat, Jymmang 10: U Bah Ardent Miller Basaïawmoit, President ka VPP, ryngkat u MLA ka North Shillong, u Bah Adelbert Nongrum, u MLA Mawlai, Bah Brightstarwell Marbañiang bad kiwei kiwei de ki nongïalam ki la wan ha Mawkyrwat na ka bynta ban leit pynshai halor ka jingktah ka Reservation Policy bad ka Roster System ïa ki Samla wadkam wadjam bad kumjuh ruh ïa ka pateng ban wan.
Haba kren ha kane ka jingïalang, kaba la pynlong ha ïew Mawkyrwat, u Bah Ardent u la ong ba ka daw ba ka Seng ka wan biang sha ki paidbah halor kane ka ishu jong ka Reservation Policy kadei namar ba ha ka por elekshon ka la buh ïa kane ka mat ha ka jingkular elekshon ban kren ha Assembly tang shu jop bad ban ïasaid ban pynbeit thymmai noh ïa ka Polisi thungkam bad ban pynsangeh noh shuwa ïa ka Roster System bad kumjuh ruh ban pynsangeh noh shuwa ïa ka jingthungkam katba ym pat lah pynbeit ïa ka Reservation Policy. Hynrei haba la rah ïa ïa kane ka mat ha Assembly, na ka liang u Speaker um shym la ailad ban ïakren, kumta ka Party ka wan biang sha ki paidbah ban ïathuh ïa kaei kaba la jia namar ba ka VPP kam dei ka Seng kaba shu mih tang ban ïaleh elekshon, hynrei kadei ka seng kaba mih ban trei bad shakri na ka bynta u paidbah.
U Bah Ardent u la pynshai ruh ba kumno ka jingbym pyrkhat jngai ki nongïalam ba mynshuwa ha ka por ba shna ïaka Reservation ka la long ka jingleh shiliang ïa ki Khasi kiba khambun briew ha kaba la bhah mar 40% hapdeng ki Khasi bad ki Garo.
“Ngim kwah ban knieh ïa ka hok kiwei, hynrei ha kajuh ka por ngim dei pat ban shah knieh ka hok jong ngi”, la ong u Bah Ardent. U la ong ruh ba lymda pynsangeh shuwa ïa ka jingthungkam katba ym pat lah ban pynbeit thymmai ïa ka Reservation Policy ki Samla Khasi kin sa duhkam duhjam syndon da bun bun snem. “Hato ngi shu shah bad shu peit haba kiba kum kine ki jia?”, u la ong.
Ha kajuh ka por u la ong ba ka VPP ka la dawa ban khot da ka dorbar kyrpang ban ïakren ïa kane hadien ba ka ïingbishar ka la kdew ba kadei ka kamram jong ka sorkar bad ka ïingdorbar thawaiñ ban pynbeit ïa ka Roster System. Hynrei na ka liang ka sorkar MDA:2 ka la sngap jar jar bad la shu ïohi khubor ba ka sorkaar kan sa lum ïa ka jingïalang jong baroh ki Party ha ka 15 tarik mynta u bnai.
Na ka liang ka VPP, u Bah Ardent u la ïathuh ba ka la dawa ba ka sorkar kan thung da ka Komiti ba kyrpang ban ïakren ïa ka Reservation Policy namar ka jingeh kam dei na ka Roster System, hynrei kadei na ka Reservation Policy. U la ong ba katba ym pat lah ban pynbeit ïa ka Reservation, ka jingeh kan ïai bteng wat lada pyntreikam ïa ka Roster. “Ka VPP kam ong ai katno ïa u Khasi bad ai katno ïa ki Garo, hynrei kan ieh ha ka jingstad kata ka Komit ka ban kynthup ïa ki jaidbynriew na baroh ar kynhum, napdeng ki Khasi bad Garo ryngkat ka jingïadon lang ki stad ki jhad kiba tip bad sngewthuh bha ïa kane ka kam.
U la ong ba ïa kane ka jingdawa yn leit rah da ka jingthoh ha ka 12 tarik mynta u bnai da ki saw ngut ki MLA sha u Myntri Rangbah bad u nongïalam ka VPP u wer ïa ki paidbah ban leit synran lang ha katei ka sngi ban pyni sha ka sorkar ba ka jingdawa kam dei tang jong ka VPP, hynrei kadei ka jong u paidbah.