43 snem kynjoh ka Nongtluh HSS Umden, da u mawkyrteng la pynsahnam ïa ki nongseng bad nongsdang jong ka skul

0

Nongpoh, Jymmang 10: Ka Nongtluh Higher Secondary School, Umden kum kawei naki shlem pule kaba la nang roi bad nang kiew shaphrang katba nang mih ki sngi ban pynphriang ïaka jingnang jingstad, kaba la kynjoh ruh haduh 43 snem u mawmer ka jingïaid lynti naduh bala seng ïaka ha u snem 1980, mynta ka sngi kala pynlong da ka jingpynkup burom ba kyrpang ïaki riew rangbah kiba la don bynta ban seng ïa katei ka skul kaba la ïeng skhem haduh mynta ban long kum kawei ka shlem ai jinghikai ba paw ha katei ka thaiñ. Ha katei kajuh ka sngi naka liang ki bor pynïaid skul kila plie ruh ïa u maw sah kyrteng bala pynsahnam ruh ïaki kyrteng ïaki nongïalam kiba la don bynta ban seng bad sdang ïa katei ka skul bala plie paidbah da u Bah Mayral Born Syiem MLA ka Nongpoh Constituency kum u kongsan.
La sakhi ruh ha katei ka sngi da ka jingdonlang u Bah Balajied Ranee MDC ka Nongpoh, ka Kong Deimebanda Blah kaba dei ka khun ksiew jong u Dr DD Lapang, Myntri Rangbah ba rim ka jylla, kumba u Dr DD Lapang um shym la lah ban wan ban shim bynta ha katei ka sngi kum u kongsan namar ka jingban ka jingshitom u ba dei ruh uwei naki nongseng jong katei ka skul, Bah O Lyngskor Vice President ka Governing Body jong ka Northern Ri Bhoi College bad Secretary ka DD Lapang Foundation, Bah F Khyndeit President ka School Managing Committee, Bah W Shylla Secretary, Kong M Shylla Principal ka Nongtluh Higher Secondary School bad kiwei kiwei ki riew pawkhmat bad ki riew rangbah naka thaiñ Umden.
Kum ban kdew hangne ki nongseng ïa katei ka skul ki don haduh 11 ngut bad 8 ngut napdeng jong ki kila khlad noh na kane ka sla pyrthei bad kiba dang sah haduh mynta ki kynthup ïa u Dr DD Lapang, Bah Nipshon Lyngkring, bad Bah Wonder Shylla.
Naka liang ka kong Deimebanda Blah khun ksiew jong u Dr DD Lapang bad u Bah OS Lyngskor Secretary ka DD Lapang Foundation kila pynpaw ba u Dr DD Lapang ba khot ïeid maheh u don ka jingïeid ba kyrpang ïaka dong Ri-Bhoi bad u da thrang dik dik ban wan hi ha katei ka sngi, hynrei namar ka jingbym shah jong ka met u la phah ïa kitei ki 2 ngut ban leit mihkhmat ba katei ka prokram ban kynmaw kyrpang ïaki nongseng jong ka skul kam dei ban pulom, ha kaba u la phah ruh da ka jingthoh kyrpang sha katei ka skul halor ka jingdap 43 snem jong ka jingïaid lyngti jong ka skul bad kumjuh ruh ka jingplie ïa u mawkyrteng ban pynsahnam ïaki nongsdang bad nongseng jong katei ka skul kumba u Dr DD Lapang u dei u ba don bynta hakhmat ha katei ka kam, ryngkat ki jingkyrkhu kyrdoh ba katei ka skul kan dang kiew shaphrang shakhmat ha ki liang baroh khamtam ban nang pynphriang ïaka jingnang jingstad.
U Bah Mayral Born Syiem MLA ka Nongpoh haba kren ha katei ka sngi kum u kongsan u la pynpaw ka jingsngewkmen kaba khraw ban iohi ba katei ka skul kala kiew shaphrang kala pule ka puthi ban long kum kawei ka shlem ai jingnang jingstad ha katei ka thaiñ, ha kaba ki riew rangbah na katei ka thaiñ ryngkat u Dr DD Lapang kila iohi jngai ban seng ïa katei ka skul watla naduh kitei ki snem kala don shibun ki jingeh jingtynjuh ban pyntyllun ïaka kam wat ban siew tulop nonghikai.
U la ong ruh ba naduh kitei ki snem bala seng ïaka, katei ka skul kala nang roi nang kiew haduh kine ki sngi ha kaba kala don haduh ka kyrdan Higher Secondary, bad u Dr. DD Lapang um shym la hun ba ki samla pule bad ki kmie ki kpa kin mad jingeh ha kaba u la don ruh ka jingangnud ban pynurlong ïaka Northern Ri-Bhoi College kaba la urlong shisha mynta haka jingïalam jong u kum u MLA ka thaiñ.
Kum u MLA u la kular ruh ban buddien ïaki kam pynroi ha ka dong ka thaiñ bad khamtam ka pule ka puthi bad ryngkat ka jing ïatreilang yn nang buddien shuh shuh ïaki jingdonkam katei ka skul bad kumjuh ruh ka Northern Ri-Bhoi College kaba ki samla pule kila shu shong mynta shipor ha campus jong katei ka skul, ban kyntiew ïaka pule ka puthi naka bynta ka jingmyntoi jong ki khun samla ka thaiñ.

Leave A Reply

Your email address will not be published.