Don 76,883 ngut ki nongthep vote ha ka SIR Final Electoral Roll ha ki artylli ki konstiwensi SWKHs District

Mawkyrwat, Risaw 26 : Ka ophis jong ka Deputy Commissioner (Election), South West Khasi Hills District, Mawkyrwat, ka la pynmih paidbah ïa ka Final Electoral Rolls jong ka 35-Ranikor (ST) bad ka 36-Mawkyrwat (ST) Assembly Constituency hapoh ka Special Intensive Revision (SIR) jong ka Photo Electoral Rolls 2026, ha kaba ka 1 tarik u Risaw, 2026 ka dei ka tarik ba la buh kyrpang (Qualifying Date).
Ïa ka jingïalang ban pyllait paidbah ïa ka Final Electoral Rolls jong ki ar tylli ki konstitwensi la pynlong mynta ka sngi ha ka Multi-Purpose Hall jong ka Deputy Commissioner’s Office Complex, South West Khasi Hills District, Mawkyrwat.
Ha ka jingïalang, u bah L.G.M. Kharmih, MCS, Additional Deputy Commissioner, South West Khasi Hills District bad Electoral Registration Officer (ERO), ha ka jingkren jong u, u la ai jingïaroh ïa baroh ki Booth Level Officers (BLOs), ki Electoral Registration Officers (EROs), ki Assistant Electoral Registration Officers (AEROs) bad ki ophisar bad nongtrei jong ka Election Branch, halor ka aiti lut jong ki wat hapdeng jong ki jingeh ha kane ka kam ban pyndep ïa kane ka jingpynrung kyrteng ïa ki nongthep vote hapoh ka SIR, ka trei shitom bad ka jinglen lade jong ki ha ka ban pyndep ïa kane kam jong ka Special Intensive Revision (SIR) 2026 hapoh ka por ba la buh.
Shuh shuh katkum ka kaiphod hapoh ka SIR 2026, ka jingbun jong ki nongthep vote ha ka Final Electoral Rolls jong kine ki ar tylli ki Konstitwensi kata ka 35-Ranikor (ST) bad ka 36-Mawkyrwat (ST) Assembly Constituency ka long 76,883 ngut, ha kaba ka 35-Ranikor (ST) ka don 37,440 ngut ki nongthep vote, katba ka 36-Mawkyrwat (ST) ka don 39,909 ngut.
Ka kaiphod ka pyni ruh ba 240 tylli ki jingthoh kyrteng la shem ba kim long kiba bit ban kynthup ha ka Final Electoral Rolls, na ki daw kum ka jingdon ki EPIC number kiba ïasyriem ne kiba la pynrung bunsien, ka jingïap, ka jingkynriah jaka sah bad kiwei ki daw kiba ïadei bad kine. Na kine, 72 tylli ki jingthoh kyrteng ki dei na Ranikor bad 168 tylli na Mawkyrwat.
Nangta, 28,253 ngut ki nongthep vote la buh kyrpang na ka bynta ka jingpynmih paidbah kaba khatduh hadien ba la dep ban phah ïa ki notice bad pynlong ïa ki jingïabishar halor kine ki notice. Na kine, 13,174 ngut ki dei na Ranikor bad 15,079 ngut na Mawkyrwat.
Nalor kata, 48,630 ngut ki nongthep vote la buh kyrpang na ka bynta ka jingpynmih paidbah kaba khatduh ha kaba ïadei bad kiwei pat ki kam. Na kine, 24,266 ngut ki dei na Ranikor bad 24,830 ngut na Mawkyrwat.
Ha kane ka prokram la don bynta lang da u L.T. Tariang, MCS, Additional Deputy Commissioner bad In-charge Sub-Divisional Officer jong ka Ranikor Civil Sub-Division, uba long ruh u Electoral Registration Officer (ERO) jong ka 35-Ranikor (ST) Assembly Constituency; u bah Shemphang Thongni, Booth Level Officer (BLO) na Ranikor, u bah Stevenson Pariong, Booth Level Officer (BLO) na Mawkyrwat bad u bah H.S. Diengdoh, uba mihkhmat ïa ki seng saiñ pyrthei bad kiba la ia ruh ka jingkren.
Ïa ka jingïalang la pynïaid da u bah I. Lawriniang, MCS, Block Development Officer, Mawkyrwat C&RD Block bad uba la shim ruh ïa ka bynta ban kren pdiang sngewbha bad ka jingkren ai khublei ïa baroh kiba la wan sha ka jingïalang.