Plie u Bah Renik ïa ki kamra klas bad ot ribon ïa ka Madan Basketball Court, ka Gallery ka Little Star HSSM

Mawkyrwat, Risaw 27: Da ka jingthmu ban pyntyllun ïa ki kam pynroi hapoh jong ka Mawkyrwat Constituency bad kumjuh ban kyntiew ïa ka pule puthi bad ki kam ïalehkai jong ki khynnah skul lyngba ka Chief Minister’s Special Development Fund (CMSDF) jong ka Sorkar Jylla, u bah Renikton Lyngdoh Tongkhar, MLA ka Mawkyrwat Constituency mynta ka sngi u la ïoh ban plie ïa ki kamra klas jong ka Rising Secondary School, Sohkhyllam bad ka Basketball Court ryngkat ka Gallery jong ka Little Star Higher Secondary School, Mawkyrwat.
Lah ban kdew ba lyngba kine ki kam pynroi na ka Sorkar Meghalaya ka la long shisha ka jingkyrkhu bad jingmyntoi kaba khraw ïa ki khynnah skul bad ki nonghikai, namar ka ïarap ban pynïoh ïa ki kamra klass kiba biang bad kiba long katkum ki jingdonkam jong ka juk mynta bad ha kaba ïa dei bad ka Basketball Court pat kan sa long ka jingkyrkhu ba kin ïoh ban pynmih ïa ki khynnah skul kiba tbit ha ki kam ïalehkai.
Ha kaba ïa dei bad ka jingtei ïa ki saw tylli ki kamra klass ba thymmai jong ka Rising Secondary School, Sohkhyllam, ka dei ha ka jingmang tyngka kaba T. 8 lak tyngka bad ka jingplie bad ot ribon ïa ka Basketball Court bad ka Galary jong ka Little Star Higher Secondary School Mawkyrwat ka dei ha ka mang tyngka kaba T. 17 lak tam lyngba ka State Sports Council jong ka Sorkar jylla.
Haba kren ha ka jingïalang, u bah Renikton Lyngdoh Tongkhar ula ai mynsiem shuh shuh ïa ki khynnah skul, ïa ki nonghikai bad ïa ki Managing Committee ba kin nang lah ban trei shitom ban kyntiew ïa ki khynnah pule ha baroh ki liang la ka long ha ka liang ka jingnang jingstad ha ki kot pule bad kumjuh ruh ha ka liang jong ki kam ïalehkai namar ki long kiba donkam.
Ha kaba ïa ka Little Star Higher Secondary School, Mawkyrwat, u bah Renikton Lyngdoh Tongkhar ula kular ban ai jingïarap T. 4 lak tyngka na ka bynta u snem 2026 – 2027 lyngba ka SRWP jong ka MLA skhim.
Kiba la donlang ha kane ka sngi ki long ka N.D. Shira, MCS, Assistant Commissioner, South West Khasi Hills District, u bah I. Lawriniang, MCS, Block Development Officer, Mawkyrwat C&RD Block, ki nonghikai na ka Rising Secondary School Sohkhyllam bad kumjuh naka ka Little Star Higher Secondary School bad ki khynnah skul.