Amlarem, Risaw 27: Ka ophis Sub-Divisional Officer (Election), Amlarem Sub-Division mynta ka sngi 26 tarik u Risaw, 2026 kala pynlong ïa ka prokram ban pyllait ïa ka Final Electoral Roll jong ka 7-Amlarem (ST) Assembly Constituency ha Conference Hall jong u SDO (Civil), Amlarem.
Ïa kane ka prokram la pynïaid da Dr. D. Lyngdoh, BDO, Amlarem C&RD Block bad ka AERO, ha kaba la wan ban ïashim bynta da ki nongtrei ka Election, ki BLO Supervisor, ki BLO, ki nongmihkhmat jong ki seng saiñpyrthei bad kiwei.
Ka kong Vevotolu Kezo, IAS, SDO (Election), Amlarem, ka la pynsngew halor ka rukom treikam jong ka Special Intensive Revision (SIR). Kala pynpaw ruh ba ka jingpynkylla thymmai ka la sdang haka 20 tarik u June, 2026 bud sa ka jingpynmih ïa ka Draft Electoral Roll ha ka 6 tarik u Nailar, 2026.
Ka la pyntip ha ka Draft SIR Electoral Roll ki don 40,650 ngut ki nongthep vote, katba ha ka ‘Final Electoral Roll’ kaba mynta kila don haduh 41,202 ngut baroh ki nongthep Vote kaba kynthup ïa ki shynrang 19,743 ngut bad ki kynthei ki long 21,459 ngut.
Ha kane ka jingpynkylla kila don 653 ngut kiba la pynrung thymmai, katba 101 ngut la weng noh. Na ki jingpyndam 70 tylli la weng hadien ka jingpynlong ïa ka SIR bad ka jingpynshisha, khamtam namar ka jingïap ne ka jingkynriah sha kawei pat ka Assembly Constituency.
Ka SDO (Election) ka la pyntip ruh ba ki jaka thep vote hapoh katei ka Constituency kila kiew na ka 82 tylli sha ka 85 tylli, ha ryngkat ki service electors ki don 11 ngut haka final roll. Kala ai khublei ïa baroh lang kiba don bynta ha kane ka jingpynbeit thymmai ïaka SIR mynta u snem 2026.
Ha kane ka prokram la ïoh ruh ka jingkren lyngkot na u B. Talang, Secretary, VPP, 7-Amlarem (ST) Assembly Constituency, hadien kane la aiti ïa ki Final Electoral Rolls sha ki nongmihkhmat jong ki seng saiñ hima sima. La ïoh ruh ka jingkren ai khublei, na u J. Tongper, UDA, Election Branch.
Kane ka jingpynmih ïa ka Final Electoral Roll ka dei ka jingpyndep ïa ka rukom treikam jong ka SIR na ka bynta ka 7-Amlarem (ST) Assembly Constituency, ha kaba baroh ki nongthep vote ki don 41,202 ngut, ha ki 85 tylli ki jaka thep vote Polling Station bad 11 ngut ki service electors recorded.
