Tuid ki paidbah ban sngewlem ha sngi leit on tep ïa kiba khlad na ka jingtwa khyndew

Jowai, Risaw 09: Ki saw ngut kiba kiba la khlad na ka jingtwa ka khyndew kaba la jia hynnin ka sngi U Blei haka shnong Pynthorlangteiñ kaba hap hapoh ka Thadlaskeiñ Block,West Jaiñtia Hills District.
Mynta ka sngi naka liang ka Balang Presbyterian Pynthorlangteiñ haka jingpynïaid u Pastor Rev. K. Dkhar kila pyndep ka jingleh burom ba khadduh ïa kine kiba la khlad, da ka jingwan sngewkhia mynsiem jong kiba bun ba lang ha ryngkat ki um mat kthang na kiba haïing ha sem.
Ha kane kane ka sngi la wan synranlang naduh ki nongïalam shnong, ki nongïalam Balang, ki kur ki kha, ki marjan marpa, ki lok ki jor nalor kiwei de.
Hadien kane la leit rah ïa ka met jong ki sha u Lum jingtep ka Balang Presbyterian Pynthorlangteiñ ha kaba la pyndeh khadduh ïa ka jingleh burom da ka jingkren lyngkot, ka jingrwai bad ka jingduwai.
Kine kiba la khlad ki long u kpa jong ka ïing (L) Kpa: Biangki Phawa 29, ka kmie (L) Pynjanai Ryngkhlem 25, ar ngut ki khun u (L) Edify Ryngkhlem 5 bad ka (L) Vladaroi Ryngkhlem 3 snem ka rta bad kane ka longïing ki long tang kum ki nongtrei bylla sngi na ka kam shoh mawria.
Na ka liang u Waheh Shnong u ma Army Lipon uba dei ruh u nonghikai haka Government Skul jong ka shnong hashwa ban leit rah ïa ki mat sha u lum jingtep, ula ïathuh ba u Edify u dei u khynnah uba tip sngi bha bad uba don ka akor ka burom kaba kham pher, ula ïathuh ba marsien lait na skul u mareh sha ka jaka trei ka kmie u kpa jong u ban rah ja sngi kumjuh ban ïarap lang ïa ki ha ka kam ba ki trei.
Shuh shuh ula ïathuh ba kane ka longïing ka long kaba dang sdang ban kiew shakhmat ha kiba bun ki bynta kata naduh ki kam haka Balang bad kumjuh ha ka imlang ka sahlang bad ki long ruh ki briew kiba kloi ban ïarap lang ha kano kano ka bynta bad bunsiem ki ju pyni ïa kata ka durkhmat phuh samrkhie.