Shillong, Risaw 09 : U Myntri ka tnat pule puthi Rakkam A Sangma ula pyntip ba ka sorkar pdeng kan sa pyllait noh shen ïa ka tulop ki nonghikai SSA ka Meghalaya la kumno kumno ruh hapoh artaiew ban wan.
Haba kren sha ki lad pathai khubor u Rakkam ula ong “Haduh mynta ka tnat Ministry of Education ka sorkar pdeng kam pat pyllait satia ïa ka song pisa jong ka 1st Installment. Ngi kyrmen ba ka Sorkar pdeng kan sa pyllait noh ha kine ki kyndiat sngi ban wan”.
U Rakkam ula pyntip ba ka sorkar jylla ka la dep ban pynbiang lut ïa baroh ki jingdonkam ïa kiba la phah sha ka Sorkar pdeng ba kan pyllait noh ïa ka song pisa.
“Hadien bala ïoh ïa ka song pisa naka sorkar pdeng, ka sorkar jylla kan sa lah ban siew ïa ka tulop ba arbnai na ka bynta ki nonghikai SSA” la ong u Rakkam.
Haba kylli, u Rakkam ula ong ba ka dei ka kamram jong ka sorkar pdeng ban siew ïa ka tulop ki nonghikai bad tang hapoh artaiew ka sorkar jylla ban sa pynurlong ïa kane ka jingkular.
Nalor kane u Myntri ula ïathuh ba ka sorkar ka la dep ban pyllait ïa ka song pisa lyngba ka PM-Poshan na ka bynta ban siew ïa ki nongtrei jong ka skhim Mid Day Meal ha ki skul.
U Rakkam ula ong ba lyngba kane ka song pisa ki nongtrei ka skhim Mid Day Meal kin ïoh ïa ka tulop kaba sah naduh u bnai Iaiong haduh June 2023 bad ha ka juh ka por ka sorkar jylla kan siew pyndep noh ïa ka tulop jong baroh haduh u bnai Risaw 2023.
Haba kylli halor ka jingdawa pynkiew tulop ki nongtrei Mid Day Meal, u Myntri ula ong, “Haduh mynta ka sorkar kam pat pynkiew ïa ka tulop bad kan siew hi katkum kaba ki dei ban ïoh”.
