Lap ka sorkar pdeng ba don haduh palat 200 tylli ki skul ba don ki khynnah skul tang hapoh 10 ngut

Shillong, Risaw 09: Ka tnat Ministry of Education ka Sorkar Pdeng ka la pytip ba ki don 168 tylli ki Primary School bad 101 tylli ki Upper Primary School ha Meghalaya kiba don tang hapoh 10 ngut ki khynnah skul.
ïa kane la pyntip da u Myntri ka tnat pule puthi Rakkam A Sangma haba pynpaw ba ka sorkar ka sngewdiaw bha halor kane ka jingduna ka jingpynrung kyrteng ki khynnah skul hapoh ki Lower Primary School bad ha ki Upper Primary School hapoh ka jylla.
“Kane ka jingkheiñ ka dei ba la ai da ka tnat Ministry of Education ka sorkar pdeng bad na ka liang ka sorkar Meghalaya khamtam ka tnat pule puthi ka la rai ban shim khia halor kane bad kan wad bniah, kiei ki daw ban pynlong ïa ki khynnah ban ym pynrung kyrteng ïalade ha ki Primary School bad ha ki Upper Primary School” la ong u Rakkam.
Haba kylli hato ka sorkar kan khang noh ne em ïa kum kine ki skul kiba don tang hapoh 10 ngut ki khynnah skul, u myntri ka tnat pule puthi ula ong “Ka jingkhang noh ïa ki kum kita ki skul kam dei eh tang ka lad ban pynbeit ïa ka jingduna hynrei ka dei shisha pat ka jingsngewkhia ba ki duna palat ki khynnah kiba pynrung kyrteng ha ki Primary School bad Upper Primary School ha Meghalaya”.
U Rakkam ula ong ba ka tnat pule puthi ka la dep ruh ban pynkynriah ïa ki khynnah na ki skul ba duna kiba pynrung kyrteng sha kiwei pat ki skul marjan hynrei ki don pat ki katto katne ki skul ha ki katto katne ki jaka kiba jngai na ki shnong bad kum ïa kita ki skul ka tnat kam lah ban shu kynriah ïa ki khynnah.
“Naka liang ka tnat pule puthi kan hap ban wad bniah ïa ki daw ba pynlong ka jingduna ka jingpynrung kyrteng ha ki skul da kaba phah ruh ïa ki ophisar jong ka tnat ban jurip ïa kum kita ki skul namar ki lah ban don shibun ki daw, kum ka jingbym biang ki kamra Class, ki nonghikai lane ki nongpynïaid skul bad kiwei kiwei de” ula ong.