Jerusalem, Risaw 09: Ka Israel mynta ka sngi, ka la rai ban pynlong da ka jingkerkut ïa ka Gaza kaba dei ka jaka shong jong ki lehnih Hamas bad ki paidbah ba kyrshan ïa ki.
Kane ka jingkerkut kan kynthup ïa ka jingkhang ban shalan marbam, umphniang kali bad ruh ban pynlip ïa ka bording elektrik bad khang ruh ïa ka um. Kane kan ktah jur ïa ki 2.3 million ne 23 lak ngut ki nongshongshnong ha kane ka jaka kaba ka jingheh jong ka, ka long tang kumba 41 Km la lynter bad 10 Km ka pynkiang.
“Ngi la hukum ban kerkut ïa kane ka jaka shong ki riew thrang snam”, la ong u Myntri ïada ri ka Israel, hadien ba ki lehnoh Hamas ki la hiar thma ïa ka Israel ha ka step jong ka sngi Saitjaiñ, ha kaba ka jingkheiñ kiba ïap tang ha Israel ki long palat 700 ngut bad da ki hajar ngut ki la mynsaw.
Naduh ka sngi Saitjaiñ, ka Israel hadien ka jingshah hiar thma kaba kyndit kyndit ha ki Hamas, ka la ther da ki bom ha ki bynta jong ka Gaza da kaba thew khambun sha ki ïing bun mala ba la pyndonkam da ki nongïalam jong ki Hamas. Ha kane ka jingther kiba bun ki ïing bun mala ki la khyllem bad da ki spah ngut ki briew ki la ïap. Ki bor synshar ka Gaza ki la ong ba palat 500 ngut ki briew ki la ïap kynthup ruh ïa ki khynnah.
Ha Israel ha jaka kaba la pynlong ïa ka Music Festival ha ka miet Sngi thohdieng bad kaba la bteng haduh ka Sngi Siatjaiñ mynstep, ki bor synshar ki la lap kumba 26 tylli met ïap jong ki Samla kiba la wan ïalehkmen ha kane ka jinglehkmen da ki sur jingrwai.
Kane kadei ka jaka kaba nyngkong eh, haba ki lehnoh Hamas ki la rung sha kane ka jaka ban siat pathar ïa kat kiba don ha katei ka jaka, ha kaba kiba wan hangtei ki kynthup ruh ïa ki tourist kiba wan na kiba bun ki ri jong ka pyrthei, kum na Amerika, Bilat, Germany bad kiwei kiwei de ki ri. Kane ka Festival ka la long ha ka shnong kaba don mar syndah bad ka Gaza. Nalor kiba la shah siat ïap ha ka rukom kaba ishyrkhei bha, kiba bun ruh ki la shah rahbor sha ki bynta jong ka Gaza.
Ha kajuh ka por na ka liang jong ka ri America, naduh hynnin ka janmiet, ka la sdang ban phah ïa ki jhad thma sha ki rud duriaw ka Israel ban pynkhreh lypa ïa ka jingïakhun pyrshah ïa ki Hamas.
Na ka liang ka Israel ruh ka la pynkhreh ban hiar da ka thma ryngkew ha kaba ka la khot ruh ïa ki shipai ba shipor ne kita ki briew kiba trei da kiwei pat ki kam, hynrei kiba la ju mlien ban ïoh jinghikai ha ki kam shipai. Kiba kum kine ka Israel ka la pynkhreh ban khot kumba 3 lak ngut.
Ka la pynïeng laiñ lypa ruh ïa ki tank thma ban tur ha kano kano ka por sha ki bynta jong ka Gaza.
Ha kane ka jingïakhun bad ki Hamas kiba synshar ïa ka Gaza, ka Israel ka la mad ruh ïa ka jingshah ther rocket ha ki bynta ba shatei jong ka ri na ka ri Lebanon, ha kaba naduh hynnin ka sngi, ki lehnoh Hezbollah ki la ther da ki rocket ïa ki ktem shipai jong ka Israel ha khappud.
