New Delhi, Risaw 09 : San tylli ki jylla ba kynthup ïa ka Chhattisgarh, Madhya Pradesh, Rajasthan, Telangana bad ka Mizoram kin sa jied ïa ki nongmihkhmat ba thymmai sha ki Iing Dorbar jong ki naduh ka 07tarik u Naiwieng haduh ka 30tarik jong utei u bnai mynta u snem.
Na ka liang ka Election Commission jong ka Ri ha ka sngi Nyngkong ka la pynbna ruh ba ka jingniew ïa ki vote pat kan sa long ha ka 03tarik u Nohprah.
Lah ruh ban ong ba kane kadei kum ka semi-final hapdeng ka BJP bad ka Liang Pyrshah ha shwa ka elekshon MP Lok Sabha kaban long ha u 2024.
Haba pynbna ïa kane ka elekshon, u Chief Election Commissioner (CEC) Rajiv Kumar u la pyntip ruh ba ka elekshon has Madhya Pradesh kan long ha ka 17tarik, ha Rajasthan ha ka 23tarik, Telangana ha ka 30 tarik bad Mizoram ha ka 07tarik Naiwieng. Katba ka Chattisgarh pat kan long ha ki ar bynta, kata na bynta ki 20 seat kan long ha ka 07tarik Naiwieng bad ha ka 07tarik pat kan dei na bynta ki 70 seat.
Kane ka elekshon ha kitei ki jylla ka long ruh kum ka jingtynjuh ïa ka bor jong ka Congress kaba don lang mynta ha ka kynhun jong ka INDIA kaba don ha ka bor ha ki ar na ki saw tylli ki jylla kiba heh. Kumjuh ruh kane kan long na ka bynta ka BJP khamtam haba ka elekshon MP hapoh ka jingïalam jong u Modi kan sa long ha u snem ban wan, kata khyndiat bnai hadien kane.
Ka jingïakhun kaba itynnad hapdeng ka BJP bad ka Congress kan long ha Madhya Pradesh, Chhatisgarh bad ha Rajasthan watla kin ïa knieh ruh ha Telangana.
