Ïakhun borbah ka KHADC ban pynkylla pisa ïa ki jaboh jabaiñ ba mih na ki tyngkong ïing

Shillong, Risaw 09 : Ka KHADC ka la ïoh ïa ka jingkyrshan na ka World Bank ban pynurlong ïa ka projek pynkylla pisa ïa ki jaboh jabaiñ kiba mih na ki ïing ki sem ne ki shnong ki thaw na baroh ki san tylli ki distrik kiba hap ha u pud u sam jong ka Council.
Ha katei ka jingïalang kaba la wan ban donlang da u Senior Urban Development Specialist World Bank, u Thierry Martin, ka Council ka la shim ïa ka rai ban ïaid shakhmat ïa kane ka projek kaba kham pher ha kaba ki jaboh ba pyut bad ki bym pyut kin ai pynban ka jingmyntoi.
Haba kren bad ki lad pathai khubor hadien ka jingïalang, u CEM ka Council, Bah Pynïaid Sing Syiem u la ïathuh ba kum ka pilot project ki la sdang shwa kawei ka Resource Recovering Centre lane ka jaka ban pynïakhlad ïa ki jaboh ba pyut bad bym pyut. Nangtei pat ïa ki tiar bym pyut kum ki plastik ki lah ban pynkylla thymmai (recycle) bad ïa ki bym long pat kum ki nar ne kiwei ki tiar kin sa pynïaid iew ha kaba kin tehlok lypa bad ki nongdie.
“Ïa mynta ngi dang sdang shwa tang kawei Resource Recovering Centre (RRC) ha Mawlai Mawroh. Ngi la rai ruh ban jied shuh sa katto katne tylli ki RRC ban pynïaid shakhmat ïa kane ka projek,” u la ong.
Katkum ka jingong jong u, katei ka sienjam ba ki shim kan dei beit da ka jingtreilang bad ki bor shnong namar ha kaba khatduh ki jaboh jabain kiba mih na kato ka shnong kin kit beit tang ha kato ka RRC.
Da kaba ai nuska, u CEM u ong ba kum ha Marten ki shnong kiba sah lai ne saw kilometer ki dang mad ïa ka jingsma hynrei ha kitei ki RRC kan ym mih satia ka jingsma.
Kumta, hadien ba ka World Bank ka la kular ban bei tyngka ïa ki jinglut, na ka liang ka Council ka la shim ruh ïa ka rai ban ïaid mynta sha baroh ki shnong bad ki Hima, ki skul bad ki college ha ki 5 tylli ki distrik ka jylla ban pynsngewthuh ïa katei ka sienjam na ka bynta ka khuid ka suba ha ki shnong ki thaw jong ki hi.
U CEM u la kren shai ruh ba lada treikam salonsar katei ka RRC, ïa ki jaboh jabain la ka long kaba pyut lane ka bym pyut kin lah ban pynïaid iew lut bad die bad kane hi kan wanrah ka jingïohnong ban ïa kaba shu bret ei kumba long baroh shi katta sha marten.
Ha kajuh ka por u la pynbna ruh ba kin sa buh ruh ka kuna kaba tyngeh na ka bynta kito ki briew kiba ju mlien ban bret pathar ïa ki jaboh jabain ha ki rudnong lane ha ki lynti syngkien.
“Kumba long mynta, don bun ki wah kiba la dap da ka jaboh jabain kum ka wah Umkhrah bad wah Umshyrpi hynrei kane ka sienjam kan ïarap ym tang ban pynneh ïa ka khuid ka suba hynrei kan long ruh ka jingpynneh pynsah ïa ka jingkhuid ki tyllong um bad ïa ka mei mariang kyllum lang,” u la bynrap shuh shuh.
Na ka liang u CEM u la pyntip ruh ba ka kynhun na ka World Bank kan sa leit jurip ïa ka marten ha ka sngi Ba-ar ban peit ïa ka rukom treikam hangtei. Shwa kane kin don shwa ka jingleit jurip ïa ka wah Umkhen kaba don Thembasuk Madanrting, ter ter sha Umpling nangtei pat sha Pynthorumkhrah, sha RRC Mawlai Mawroh bad pynkut ha Marten.