La tep donburom ïa u Kpa Bakhuid, Pope Francis : Leit sngewlem ki nongïalam na ki ri ka pyrthei

Vatican City, Ïaiong 26 : Da ki lak ngut ki paidbah kynthup ïa ki nongïalam na kylleng ki ri jong ka pyrthei ki la tuid sha ka jinglehniam ba khatduh ïa u Kpa Bakhuid, Pope Francis kaba long ha kane ka sngi Saitjaiñ ha St. Peter’s Square ha shwa ban tep donburom pat ïa u hapoh ka Iingmane-bah Santa Maria Maggiore Basilica ha Rome.
Ki nongïalam jong ka pyrthei kiba la wan ban ai khublei khatduh ïa u Kpa Bakhuid ha kane ka sngi ki kynthup ïa ka President ka India ka Droupadi Murmu, nangta u President ka US u Donald Trump nalor kiwei ki nongïalam jong ka pyrthei kiba la kynduh bad ki bym pat kynduh ïa u Pope haba ïadei bad ki ishu kiba ktah ïa ka pyrthei.
Nalor kine, kiwei pat kiba donlang ki long naduh u Prince William, President ka France, u Syiem ka Spain, u President ka Brazil, u President ka Ukraine, bad kiwei kiwei nalor ki nongïalam ka Balang.
Mar ïa poi ka met jong u Kpa Bakhuid ha St. Peter’s Square, ki paidbah ki la ieng lut ban thapkti kum ka dak ban ai khublei khatduh ïa u.
Ha kane ka jinglehniam ba khatduh la antad ba ka jingpoi jong ki paidbah ka la kot sha ka 200,000 ngut ei ei nalor ki bor sorkar jong ka Italy bad Vatican kiba la pynjur bha ïa ka bor pahara bad ka jingpeitngor na ka bynta ka jingïaid beit ka jinglehniam.
Hadien ba la dep ka jinglehniam, da ki hajar bad ki lak ngut ki paidbah ki ieng ha baroh arliang ka surok ban ai khublei khatduh ïa ka met jong u Kpa Bakhuid kaba la thep hapoh ka kali haduh ban da poi sha ka jaka ba la pynkhreh ha Santa Maria Maggiore Basilica kaba don kumta 6 kilometer ei ei.
Ha kine ki lai sngi, palat 250,000 ngut ki paidbah ki la tuid sha ka Vatican ban ïohi bad ai khublei ïa u Kpa Bakhuid ha ka sien kaba khatduh.
Ha ka por ba ka pyrthei baroh ka khihwin na ka jingkynad kylleng kylleng, hynrei ka khubor kaba khatduh na u Kpa Bakhuid ka long beit na ka bynta ka jingsuk ha ka pyrthei shi tyllup bad ruh ka jinglaitluid ban mane blei bad ban pynpaw ïa ka jingsngew.
Lah ban kdew hangne ba u Pope Francis u la shimti kum u Kpa Bakhuid ha u snem 2013 na kti jong u Pope Benedict XVI. Hynrei dei ha ka 21tarik ba une u Kpa Bakhuid u la khlad noh na ka daw ka jingpang stroke, kata tang khyndiat taiew ba u la wan phai iing na ka jingshah sumar ïa ka jingshitom pneumonia. Ym tang katta, u Kpa Bakhuid ha ki 20 kynta shwa ba un khlad noh u la mih khatduh ban ai khublei Paskha ïa ki paidbah ban pynkynmaw ïa ka pyrthei ïa ka jingkordor ka jingim bad ban kyntu ïa ki paidbah ban pynthymmai ïa ka jingkyrmen na ka bynta ka jingsuk.