Jerusalem, Risaw 09: Napdeng ki spah ngut ki nong Israel kiba la shah rahbor ha ki lehnoh Hamas ha ka sngi Saitjaiñ ha ka por ba shah hiar thma ka Israel, uwei udei u riew tymmen uba ka Israel ka la ong ba udei uba lait im na ka jingshah leh beiñ ha ki Shipai Nazi jong u Adolf Hiltler ha ka thma bah pyrthei kaba ne kata ka Holocaust.
La ïathuh ba une u riewtymmen udei uba la shu shong ha ka wheel chair bad la suba ba ki lehnoh ki la rahbor ïa u na ïing, namar ki Hamas ym tang ba ki la siat pathar ïa ki riew paidbah ha ki surok, hynrei ki la rung ruh sha ki ïing ki sem bad siat ïap bad rahbor ïa ki briew.
Napdeng kiba la shah rahbor ne kita kiba long kum ki Hostage jong ki lehnoh Hamas, ki kynthup ruh ïa ki kynthei, ki khynnah kiba dang rit ruh.
Da ki million ngut ki briew ki la shah pynïap ha ka rukom kaba shyrkhei tam ha ki shipai Nazi jong ka Germany ha ka thma bah kaba ar, kaba long ka khana kaba ka pyrthei haduh mynta ka dang ïathuh khana, bad ka pyrshah ïa kino kino ki briew kiba don jingïadei bad ki shipai Nazi.
