Jowai, Risaw 28 : Ïa ka ïew Jaraiñ kaba la tip mynta kum ka ‘Amwi Ar Lyngdoh Jaraiñ Private Market’ la plie paidbah biang ïaka ha kane ka 27 tarik u Risaw, 2026 da u myntri ka sorkar jylla u ma Lahkmen Rymbui bad uba dei ruh u MLA ka thaiñ kum u kongsan.
Ha kane ka sngi la wan ban donlang da u ma Medling M. Swer, E.M ka JHADC, u Dolloi Elaka Amwi ma Jemiwell Pyrtuh, ka kong R. Syiemlieh, S.O, JHADC, ki nongmihkhmat na ki saw tylli ki Dorbar Shnong, ki dkhot ka Managing Committee bad kiwei de ki riew rangbah.
Haba ai jingkren u ma Lahkmen Rymbui ula ong ka jingplie biang ïa kane ka ïew kan long ka jingmyntoi ïa ki paidbah nongshong shnong ka thaiñ. U kyrmen lyngba kane ka ïew kan wanrah ka jingkiew haka ïoh ka kot hapoh ka thaiñ, ka lad kamai kajih bad ka jingmyntoi ïa ki nongkhaïi, ki nongthied nongpet bad ki paidbah jong ki shnong ba marjan. Ula khot ruh ban don ka jingïatreilang hapdeng ki kynhun Dorbar Shnong, ka Managing Committee bad ki bor ba dei peit ban pynïaid beit pynïaid ryntih ïa kane ka ïew.
U ma Medling M. Swer, E.M., JHADC ula ai ka jingïaroh ïa ka jingtreilang jong ki kynhun Dorhar Shnong, ka Managing Committee bad ka JHADC ban pynbeit ïa kane ka jingeh kiba la ktah ïa ka ïew naduh bala khang ïaka. Ula pynpaw ka jingkyrmen ba ka jingplie biang ïaka kan wanrah ïa ka roi ka par hapoh ka thaiñ hi baroh kawei.
U Dolloi Elaka Amwi ma Jemiwell Pyrtuh ula pynpaw ka jingkyrshan ban plie biang ïa kane ka ïew bad kaba donkam ka long ban don ka jingïatylli bad ka jingïatreilang hapdeng ki saw tylli ki Dorbar Shnong na ka bynta ka jingbha jingmiat jong kane ka ïew.
Na ka liang ka JHADC ka kong R. Syiemlieh, S.O., JHADC kala pynkynmaw lyngkot ba ka Iew Jaraiñ Private Market kala treikam naduh ki snem 1980 ter ter. Hadien ka jingïapher jingmut hapdeng ki saw tylli ki Dorbar Shnong kiba ïadei naduh u snem 2017 shaneng, la khang noh ïa ka ïew katkum E.C. Decision No. 7 dated 3rd August, 2023.
Kala pyntip ba hadien ka jingïasngewthuh jingmut ba thymmai hapdeng ki saw tylli ki Dorbar Shnong bad ka Resolution ba la aiti haka 12 tarik Jymmang, 2026, la shimkhia ban pynbeit da ka JHADC, lyngba u EM-in-Charge, ki MDC bad ki nongïalam shnong ban plie biang ïa ka. La pynlong ïa ka jingtohkit (spot inquiry) ha ka 15 tarik June, 2026, hadien kane la mynjur ban plie biang ïa katei ka ïew bad la ai kyrteng noh ïa ka kum ka ‘Amwi Ar Lyngdoh Jarain Private Market’. Hadien kata la ïasoi ïa ka jingïateh haka 10 tarik u August, 2026.
Shuh shuh la pyntip ha kane ka ïew yn pynlong shisien shi taïew, la kyntu ruh ban pynneh ïa ka jingkhuid jingsuba, ka jinglong ryntih, ka jingburom mar kylliang bad ka jingïatreilang ha baroh ki liang.
