Tuid da ki hajar ha ka Road Show bad jingïalang paidbah jong u Bah Mayral Born ha Nongpoh-Umden

0

Nongpoh, Rymphang 23: Da ki hajar ngut ki paidbah nongkyrshan jong ka party UDP mynta ka sngi kila mih sha surok haka Road Show bala pynlong da ka party UDP naka bynta ban kyrshan radbah ban pynjop ïa u Bah Mayral Born Syiem kyrtong ka UDP na Nongpoh Constituency ha kane ka elekshon ban wan.
Ïa katei ka Road Show la sdang naduh Pahamsyiem ter ter shaduh Pahammawleiñ 20 mer bad pynkut shaduh madan Umden, ha kaba naka liang u kyrtong ka UDP u Bah Mayral Born Syiem u la leit ban pynshai paidbah ïaki jingangnud bad jingthmu ban pynurlong lada un wan haka bor ban bteng ïaki kam pynroi ha Nongpoh Constituency.
Ha katei ka sngi la sakhi ruh da ka jingdonlang u Bah Mayral Born Syiem kyrtong ka UDP, Bah Balajied Ranee MDC, Bah Dipul Ryntathiang President ka UDP ha Umsning bad kiwei kiwei ki riew rangbah bad ki nongïalam ba hakhmat ka party.
Haba kren ha katei ka sngi, u Bah Mayral Born Syiem, u la ai khublei kyrpang ïaki paidbah ka Nongpoh Constituency baroh kawei kiba la pynjop donburom ïa u ha u snem 2018 bad kum uwei naki kyrtong u ba la ïeng ban aireng biang ha kane ka kynti naka party UDP u la pan ka jingkyrshan ba radbah naki paidbah ka Nongpoh baroh kawei, kumba ki paidbah haka jylla baroh kawei kin mih paidbah haka 27 tarik ban jied ïaki nongmihkhmat jong ki sha ka ïing Dorbar thawaiñ ka jylla.
“Kumba phi ki paidbah phi la jied ïanga kum u nongmihkhmat ha u 2018, nga pynpaw ka jingsngewnguh kaba khraw ba phi pynlong ïanga kumne kumba nga long, bad nga sngew ban ai jingkhublei ruh ïaki paidbah ki bym shym la kyrshan ïanga ha u 2018 ba ngin ïa treilang ha kane ka kynti naka bynta ban ailad biang ïanga sa shisien kum u MLA ban mihkhmat ïaka Nongpoh Constituency sha ka ïing Dorbar thawaiñ ka jylla ban kit ban bah ïaki mat ba bun ba donkam ha Nongpoh Constituency, haka dong Ri-Bhoi bad ka jylla baroh kawei” la ong u Bah Mayral.

Leave A Reply

Your email address will not be published.