Kyntu u nongïalam ka HANM na Jaiñtia ban stad haba jied ïa ki nongmihkhmat

Khliehriat, Rymphang 23 : U nongïalam ba ha khmat jong ka Hynñiewtrep Achik National Movement na ri lum Jaiñtia, u bah Shaniahlang Suchen, haba kren sha ki pathai khubor, u la pynpaw ka jingsngew khia halor kiei kiei kiba kum ka jaitbynriew ka la ïakynduh ha kine ki san snem kiba la leit kaba hapoh ka jingsnyshar ka sorkar MDA, u kyntu ïa ki paidbah ba ha kane ka kynti ki dei ban long noh kiba stad ban jied ïa ki nongmihkhat kiba lah ban wanrah ïa ka bha ka miat, ka roi ka kiew ha ka ri bad ka jaitbynriew.
“Ha shwa ba kan poi ka sngi ban jied ïa ki nongmihkhmat, na ka liang jong nga, kum uwei na ki nongïalam Sengbhalang na ri lum Jaiñtia, nga sngew ban buh ka jingkyntu ïa baroh ki paidbah ba ki dei ban long kiba stad ban jied, ki dei ban jied ïa ki nongmihkhmat kiba lah ban shna ïa ka sorkar kaba na ka bynta ki paidbah, ym na ka bynta ban pyndap tang ïala ka jong ka pla la jong, ngi la ïohi ruh ba ka sorkar MDA ba la lam khmat da u Conrad Sangma kam don kata ka rukom treikam kaba lah ban aikam aijam ïa ki paidbah , ngi ïohi ruh, ba ha ki snem kiba la leit ki jingïakhih ki paidbah, jingïakhih ki sengbhalang ka jur bha, kumta ngim kwah shuh ban dang ïohi ba ki paidbah kin ïa mih sha surok ban rah lama ïong, ban pyrshah sorkar, ngam kwah shuh ban ïa ka jing ïa um snam, namar lada ka sorkar ka pyni bor ngi kum ki paidbah ngim banse, kumta ha kane ka por nga kyntu ïa phi ki paidbah ba phin sngewbha ba phin jied ïa ki nongmihkhmat da kaba pyrkhat bha, jied ïa kiba trei bha na ka bynta ka bha ka miat jong ki paidbah” pynpaw u bah Shaniahlang Suchen.
Haba kren shaphang ka kam dewïong, utei u nongïalam ka HANM na Jaiñtia, u la pynpaw ka jingsngew khia bad ong ba “ha ka jingshisha ka ïingbishar ba ha khlieh (SC) ka la dep ai ïa ka hukum (order) ïa ka sorkar Meghalaya ban ai noh ïa ka mining ne ai license noh ïa kino kino ki nongtrei dewïong, ba kin ïoh license ban pyntrei ïa u dewïong, hynrei kumba long mynta ka sorkar MDA ka shu leh matlah, ka kwah ban shu pynïaid tuh khnang ban ïoh kamai tang ïalade, ngi kwah ban pynduh jait noh ïa kum kine ki jait kam, ngi kwah ba ka sorkar kan thaw ïa ki aiñ ki kyndon ki ban shah ïa ki paidbah ban trei dewïong da ki kyndon aiñ, khnang ba ka pla tyngka jong ka sorkar ruh kan bun, ngi kwah ba ïa ka sorkar kaba thymmai ka ban lah ban thaw ïa ki aiñ ban wanrah ïa ka roi ka kiew”
U la pynpaw ruh ba kum uwei na ki nongïalam sengbhalang, u kwah ban ioh noh da ka sorkar kaba lah ruh ban shna ïa ki aiñ ki ban lah ban tehlakam ïa ka jingwan rung kyrthep ki mynder sha kane ka jylla, kumjuh ruh kaba lah ban shna ïa ki aiñ ki ban pynneh pynsah ïa ka khyndew ka shyiap, kumjuh ruh ban shna ïa ki aiñ ban ïada ïa ki riti ki dustur, u la ong ruh ba ki paidbah kim dei shuh ban ngat ha ka jingshah pynbor ne da ka bor pisa ban thep ïa ki vote “dei ban kynmaw ba ha kine ki san snem kiba la leit, ngi la mad shibun ki jingeh hapoh ka jingïalam u Conrad Sangma, kum u myntri rangbah, nga pynkynmaw ruh ïa ka jingshah siat ïap u bah cherish Thangkhiw, kam shym la don kano kano ka daw ba u la leh, hynrei hapoh ka jingïalam u Conrad Sangma kum u myntri rangbah la shu shim noh ïa ka jingim jong u, wat la ka dei ka sngi kyrpang jong ka ri, ka 15 tarik nailar ka la mih pynban ka huri hura, ka mih ka jingiakhi, ,kaei ka daw ba ka mih kane ka huri hura ka dei namar ba kane ka sorkar u Conrad kam don ka jingshakri kaba na ka bynta ka bha ka miat”
“Ka jingjied ïa ki nongmihkhmat ka don ha ka kti jong phi ki paidbah, kam dei ban long ba mynta ngin jied ïa ki nongmihkhmat bad lashai pat ngin ïa mih ngin ïa rah pla card ha surok, kumta ngi kum u nongïalam seng bhalang, nga phah ïa u kyrwoh sha baroh ki paidbah ba kin sngewbha ban jied ïa ki nngmihkhmat da kito kiba trei na ka bynta ka lawei ki khun ki kti, wat pyrkhat tang ïa ka mynta” bynrap shuh shuh u bah Suchen.