Ki jingkop kyreit jong ka NPP ki la kut, 2 tarik, Lber yn jop kput ka Congress: Bah Good Hope

Nongstoiñ, Rymphang 23: “Ki jingkop kyreit baroh katto ki la kut ïa ka NPP, namar ki paidbah ka Nongstoiñ hi ki la ngiah la kdang bad ki thrang dik dik ïa ka jingkylla bad kane kan urlong namar ha ka 2 tarik ka party Congress kan jop kput”, ong u Bah Good Hope Sangleiñ u riew rangbah ba la kyrshan borbah ïa ka NPP Nongstoiñ ha u 2018, hynrei mynta u la kyrshan noh ïa ka seng Congress na kane ka Constituency.
U Bah Good Hope haba ai jingkren hakhmat iew Nongstoiñ ha ka sngi palei u la ong ruh, “Kum u riew paidbah nga mih mynta ban kyrshan ïa ka seng Congress, namar ngi la shah ñiew beiñ bad ka jingshah pynïapher uwei na uwei kaba la long sha ba palat”, u la ong bad bynrap, “Ha u 2018 ngi kyrshan ïa ka NPP bad ka daw ka dei namar baroh ngi la shah pynbiej ha ki ishu jong ka. Kawei na ki ka dei ka jingïadei kaba la paw tyngkreiñ ha ka por ba thaw sorkar ba pleng ka NPP ka don jingïadei ba jan bad ka BJP”.
“Une u MLA ka NPP u la thok ïa ki samla da kaba u ong ba lada u jop un thung kam uwei shi ïing. Hynrei kata ka rukom thung kam kam long katkum ka aiñ bad u la shu thung sop sop tang ïa kita kiba u mon, da kaba hateng hateng lei rung virus syndon sa ka computer ruh. U la kular pyllait dewiong ryngkat ki heh sorkar jong u, hynrei ynda la wan kit ïa u dewiong ha Nongstoiñ shah phaiñ pynban 95 hajar. Kane ka dei ka kam thok kam shukor ïa ki paidbah”.
“U la kop ban shna ïa ki aiñ ban ïada ïa ka jaidbynriew bad ïa ka jinglong trai ïa ka khyndew ka shyiap. Hynrei, haba u la don ha Assembly u la kop ba u dei u nongai buit ïa ka sorkar MDA bad leit ïa sylla pynban ban shna ïa ka aiñ ïa khalai Casino. Nalor nangta u la pyrshang ban wanrah ruh ïa kata ka Night Club ha Nongkhnum bad jin lada ki seng longkmie kim pyrshah, lehse katta katei ka dewlynnong ka la shah pynjaboh watla ka don ha ka ïa ka jingitynnad jing-ithiang.”
“Phi kynmaw ba ki seng longkmie ki la khih ban pynduh noh ïa ki wine store, hynrei kane ka sorkar MDA ka la ailad pynban ïa kata ka home delivery ban pynpoi kyiad syndon sha ki thliew ïing briew. Imat ïa kane ruh la ai buit da une u MLA jong ka NPP na Nongstoiñ”, u la ong bad bynrap, “Une u MLA ka NPP u la ong ba ki kam pynroi ha kane ka Constituency ki la kajuh bad kiwei ki jaka ba la kham roi. Hynrei sngewsih ba kita ki kam pynroi jong u ki dei tang ki doh kyndang jong u ïa ki synran, ki dalal jong u”.
“Ha kine ki sngi ba la dep ngi la ïohi ïa kaei kaba la jia ïa ka surok Sangriang bad haba ki shnong ki mih ban pyrshah ïa ka jingtrei torti, ki byrngem pynban ba lada phi pynwit yn rah noh shawei, kat haduh ba bapli ki shnong ki hap shu sngap noh. Wat ka surok Nongstoiñ-Sohpïan kaba la dep pynbna da ka surok double lane, hynrei u la shet shukor ïa ngi bad khlem leh ïa kaba dei ban leh. Ka surok Maweit ruh kumjuh ki kwah shna ïa ka tang ban jop elekshon ïalade, ym don ki ban pyrkhat ïa ki paidbah”.
U la ong ruh, “Balei lada u Conrad u lah ban plie lai saw tylli kita ki Block, katba ïa ka Hospital jong ki khunlung bad ki longkmie kaba don ha Nongstoiñ ym lah ban plie shuh haduh mynta. Hato balei ym lah ban pyndep bad plie noh ïa ka Polytechnic lane shna khambun ki jaka ieng kali hapoh sor Nongstoiñ, hato balei ym lah ban pynpra noh ïa u lum ba don ka Police station mynta. Hato kamut aiu ban pynduh permit ïa ki local, hato phi thmu ban pynduh ja ïa ki ba rit ba ria”.
“Katno ngi sngew rem ban ïoh sngew ba kiba bun kiba kynnoh mynta ba ka Ïing Syiem ka dei ka ophis jong ka NPP. Ngi sngew rem shisha ban ong ba ka DC ophis ka dei ka jabieng jong ka NPP, lane ba ka tnad PHE ka dei ka ïing shet ja jong ka NPP bad ka PWD ka dei ka kamra shong kai jong ka NPP. Hato ngi ki paidbah ngim don ka hok ban kren ei ei shuh ïa kitei ki tnad”.
“Nga te nga ong ka lah biang katto, ngim dei ki paidbah ba biej wat ju wan pynbiej shuh ïa ngi. Ka la dei ka por ba ngin pynrem kput ïa kane ka NPP kaba synshar ïakjakor ïa ka dong ka thaiñ jong ngi bad ïa ka Jaidbynriew baroh kawei”.
“Ka UDP ruh kajuh kam don jingpher ei ei ka tip tang ban kynnoh ïa kiwei high level, hynrei kam ïapher ei ei bad ka NPP namar ki dei na kajuh ka ïing shu ïa pher tang ka kyrteng. Mano ba khanglad ïa u Bah Adelbert Nongrum ha Assembly ban kren, hato ym dei u bah Metbah. Mano ba ai hukum ban shim ïa ka jingim jong u Bah Che hato ym dei u Lakmen Rymbui jong ka UDP. Ta ka daw wat kren ïa kiwei namar phi ruh phi dei kajuh hi ha ka kyrdan high level”.
“Ka por ka la biang eh ba kum ki nongshong shnong ngin ïa tylli mynta.Ym donkam pynpra ïa ka vote shane shatai lada ngi la isih shisha ïa ka sorkar MDA. Ai ïa ka vote jong phi sha ka Congress. Tang ban liem noh kane ka sorkar Ïakjakor to ngin ïa tylli kawei sha ka Congress, namar kumba ka long haduh mynta dei tang ka Congress kaba lah ban pynliem ïa kane ka sorkar MDA, namar lait nangta baroh ki dei tang ki Dalal jong ka NPP”, ong u Bah Good Hope Sangleiñ.