Nongstoiñ, Rymphang 23: Ki nongïalam jong ka Hynñiewtrep Youth Council ki la hiar sha Nongstoiñ ban pynshai sha ki paitbah, ba ha kane ka election ka ban long ha ka 27 tarik, shuwa ba kin mih na ki ïing jong ki ban leit thep ïa ka vote, ki dei ban da pyrkhat bad puson namar lada ki bakla ha kane ka kynti, ka jingbabe bad ka jingtim kan long ïa ka pateng ban wan.
Lah ban kdew hangne ba ha ki taïew ba la dep ka HYC ka la leit kylleng ki jaka ban pynshai paidbah. Ka la pan jingbit ruh na ka shnong New Nongstoiñ ban pynlong ïa ka jingïalang paitbah ha ïew, hynrei la ong ba ka dorbar shnong kam shah satia. Kane ka dei kaba la ong da u bah Wanteibok Lyngdoh general secretary ka HYC West Khasi Hills.
“Katei ka jingbym ai jingbit jong ka dorbar shnong New Nongstoiñ ïa ka seng HYC ban pynlong jingïalang ha ïew, ka la pynsuba jur ba ka lah ban don kaei re kaei sha lyndet jong ki nongïalam shnong bad katei ka jingsuba ka la paw pyrthei mynta ka sngi, na ka jingsaphriang jong ki kyntien kiba mih na ki nongkyrshan ka NPP, kaba la kynthoh ïa ki nongïalam ka HYC sengkmie ba ki dei ki ksew”, ong u samla Wantei Lyngdoh.
Halor katei ka jingkynnoh kaba la sapahriang sted bha ha ki Social media, u bah Robertjune Kharjahrin u la kren bad pynshai nyngkong eh da kaba ong ba katei ka jingkynthoh ïa ki nongïalam ka HYC ba ki dei ki ksew, ka dei ka bym lah ban pdiang ha ka imlang sahlang.
Ha ka jingïalang kaba la long ha Ladweitang, u bah Kharjahrin haba pynshai paitbah u la ong ba ha kine ki san snem ba la dep, ha ka jingsynshar jong ka sorkar MDA ba la ïalam da ka NPP, ki paitbah ki la shah kheiñ kum ki ksew kumba la kynthoh da uwei na ki dkhot ka NPP na Nongstoñ. Nalor kata ki la mad ïa ki jingeh kiba bun jait namar ka jingbakla ki paitbah ban jied ïa ki nongmihkhmat ha u 2018.
U la ong ruh ba ym lah ban len ba ki nongmihkhmat kiba don ha ka sorkar MDA kim dei satia ki nongïalam, hynrei ki dei ki nonglilam ïa ka khyndew ka shyiap khamtam ha West Khasi Hills ha kaba ïa ki 12 tylli ki shnong kiba hap ha ka hima Nonglang Sirdarship, la die lilam sha ka Assam ha ka por ba ki ar ngut ki Myntri Rangbah ki la ïasoi ïa ka soskular pynbeit pud. Halor katei ka jingleh ki paitbah ka hima Nonglang lem bad ki nongïalam jong ki sengbhalang ki hap ban ai da ka mokutduma shaduh Supreme Court.
U la ong ruh ba na ka bynta ban saiñ dur ïa ka lawei ka jong ki khun ki kti, ka shong ha ngi ki kmie ki kpa bad ha kane ka kynti lada bakla ban jied ïa ki nongmihkhmat, kam myntoi shuh ban babe hadien. U la buh jingkylli ruh ba hato ïa ka ophis u Deputy Commissioner jog ka West Khasi Hills kam dei kaba la don naduh mynshuwa ? hato ka National Highway Shillong Tura ka dang don mynta?.
Hato ki skul bad ki college ki dang don mynta ne ki la don lypa naduh mynshuwa. U la ong ruh ba ka jingkam jong u MLA ka Nongstoiñ ba u la pynïoh surok, ka dei tang kum kaba shu pushara na jrong, namar ba baroh ki surok ha West Khasi Hills ki dei kiba la dep trei lypa naduh ka sorkar ba mynshuwa ym kane ka sorkar MDA hynrei katta ruh ki dang sngew sarong.
Utei u nongïalam ka seng u la ong ruh ba ka long jingjah burom kaba khraw ïa kane ka sorkar kaba mynta, namar dang ha ka sngi palei u Amit Shah Myntri kam pohïing ka sorkar pdeng, u la ther tyngeh da kaba ong ba ka jylla Meghglaya ka dei ka jylla kaba wan ba nyngkong ha ka jingbam-sap na baroh ki jylla ka thaiñ shatei lam mihgi. Ka dei ruh ka jylla kaba wan ha trai duh ha ka liang ka pule puthi hato ki paitbah ki dang sngew dei ban jied ïa ka sorkar kaba kum kata?
