Nongstoiñ, Rymphang, 23: “Na ka liang jong ngi ka BJP lada ngi wan ha ka bor sorkar, ngin wanrah ïa ki lad ïoh kam ïoh jam bad kyntiew ïa ka ïoh ka kot, da kaba ngin buh da kita ki stad ki riew shemphang kiba ïa dei bad ka kam khaïi pateng, da kaba ngin wanrah syndon ruh kumba 10 millian US dollar na ka bynta ban pynkhlaiñ ïa ka kamai kajih bad ban pynïoh kam ïoh jam ïa ki khun samla jong ngi,” ong u kyrtong ka BJP na Nongstoiñ Constituency u Bah D. Jyndiang.
“Bun ki kynnoh ïa ka party BJP ba ka dei ka party shit niam Hindu, hynrei nga ong ïa phi ba ka Party BJP kam long kumta. Lada buaid niam tharai ka balang Khristan kam ïoh ban rung ha ka Jylla jong ngi. Kumta nga kyrpad ïa ki paidbah ba kim dei ban shah ïalam bakla halor kane ka bynta,” u la ong.
“Na ka liang ka party BJP lyngba ka Manifesto ngi kular kumba 200 klur tyngka sha baroh ki kynhun niam bapher bapher ba kin lah ban shna ïa ki jaka mane Blei. Kampher kano kano ka kynhun niam ruh, hynrei baroh kin ïoh bynta lang lyngba kane ka mang tyngka ban shna ne pynbha ïa ki Ïingmane, khamtam por long jingïaseng Synod ne kiwei pat ki jingïaseng heh kumjuh”, ong u Bah Dios.
“Ha ka 27 tarik ym dei ban shah pynbiej lane shah ïalam bakla, hynrei nion beit ha ka shap jong u syntiew lotus. Wat ju sngap ïa kito kiba wan tyrwa 5000, 10000, 15000. Na ka liang ka BJP ngim don pisa ban tyrwa, hynrei lada ki paidbah ki kyrshan, ngin thaw ki lad jingïarap lada ka long da kano kano ka lynti ruh kyrpang ïa kiba duk ba kyrduh”, u la ong.
