Pynjur bor pahara ka bor district ha Block II ban ïaid beit ka jingjied election ha Meghalaya
Nongpoh, Rymphang 23: U Deputy Commissioner ka Ri Bhoi District bad uba dei ruh u District Election Officer ka Ri Bhoi, mynta ka sngi u la ong ba na ka liang ka bor District ka la pynjur ïa ki bor pahara ha Block II, kaba dang dei ka jaka ïa kajia pud hapdeng ka Assam bad ka Meghalaya na ka bynta ban ïaid beit ïaid ryntih ka jingthep vote ki paidbah na katei ka shnong khapppud.
Haba ïa kren bad ki Nongthoh Khubor mynta ka sngi ha ka ophis treikam jong u ha Nongpoh, u Deputy commissioner ka Ri Bhoi bad uba dei ruh u District Election Officer, u Arpit Upadhaya u la ïathuh ba na ka liang ka bor District ka la pynjur ïa ki bor pahara ha kitei ki shnong khappud, ka dei ruh hadien ba la don uwei na u MLA na West Karbi Anglong u la byrngem ban nym shah ban wan thep vote ïa ki paidbah na katei ka shnong khappud ha kane ka election hapoh ka jylla Meghalaya.
“Ban lait na kino kino ki jingshah pynthud bad ban ïaid beit ïaid ryntih kane ka election bad ruh ban nym don kano kano ka jingpyntieng pynsmiej ïa ki nongthep vote, ka bor District ka la dep phah ïa ki bor pulit, ki CRPF ba kin pahara man ka sngi ha ki shnong khappud ka Block II bad la leh ïa kane ka long shi bynta ban nym shah ktah ki paidbah nongthep vote ha kane ka election 2023 hapoh ka jylla” ong u Arpit Upadhaya.
U la ïathuh na ka liang jong u kum u Deputy Commissioner ka Ri Bhoi u la dep ïa kren ruh sha u Deputy Commissioner ka West Karbai Anglong bad ruh na ka liang u Chief Secretary ka jylla Meghalaya ruh u la dep ban phah da ka jingthoh sha u Chief Secretary ka Assam ban shim khia ban nym don kano kano ka jingpynthud na ka liang ka Assam ha kane ka jingthep vote bad na ka liang kitei ki heh sorkar ka Assam ruh ki la pynthikna ba kin ïa trei lang ban nym don kano kano ka jingshah pynthud jong ki nongthep vote sha ka jylla Meghalaya, u la ong.
Shuh shuh, na ka liang u Deputy Commissioner ka Ri Bhoi, u la on gong ruh ba ka bor district ka maham ïa kino kino kiba pynmih ïa ki khubor thok ne kino kino kiba ktah ïa ka jingïaid beit ïaid ryntih ka jingjied nongmihkhmat ha ka jylla Meghalaya bad lada lap ïa kino kino kiba wan rah ïa ka huri hura kaba ktah ïa ka shongsuk shongsain ki paidbah bad ruh kaba ktah ïa kane ka jingjied nongmihkhmat kin sa shah pynshitom katkum ki kyndon jong ka aiñ. Na ka liang une u heh ophisar ka District u la pynshlur ruh ba baroh ki nongthep vote ki dei ban leit thep vote ban pynthikna ïa kata ka hok thep vote jongki bad kawei ka vote ruh kan nym dei ban shah ktah bad baroh ki dei ban ioh ïa la ka hok thep vote kumba la pynkup bor da ka riti synshar ka ri, u la bynrap shuh shuh.