Shillong, Nohprah 21: Ka Khasi Jaintia Christian Leaders Forum (KJCLF) Shillong, kala pynpaw ka jingsngewkhia bad sngewlem na ka bynta ki para Khristan ha Chhattisgarh, halor ka jingshah thombor ha kine ki sngi kiba ladep namar ka jingmane Blei jong ki.
U Rev Dr EH Kharkongor Secretary, u la ong ba ka Forum ka sngew synei na ka bynta jong ki halor kane ka jingshah ban beiñ namar ka jingngeit jong ki. Ha kajuh ka por ka Forum ka pynpaw ka jingsngew syier halor ki jingjia kiba jia ha kine ki sngi ïa ki Khristan bad kiwei kiwei de ki niam rit paid ha ka ri India. “Ki jingjia kum ka jingshah shoh shah dat, ka jingshah beh na ïing, bad kaba kham pynsngewsih eh ka long ba ki bor sorkar kim treh ban rejistar case eiei pyrshah ïa kine ki riew thombor”, la ong u Rev. Dr Kharkongor.
Ka KJCLF ka ïasnoh kti lang bad kiwei pat ki Kyhun Khristan ha ka ri ban pynrem jur ïa kine ki jingthombor ïa ki para Khristan ha ri India bad kyntu ïa ki bor sorkar ba kin pynshitom jur ïa kito ki briew kiba donkti ha ki kam thombor bad ban ai jingïada ïa ki.
U Pastor u la ong ruh ba kine ki kam thombor ki kam pyntriem kidei ban sangeh noh bad ka KJCLF ka khot ïa ki nongïalam, ïa ki riewngeit ba dei ban ïeng pyrshah ïa kiba kum kine ki kam thombor ïa la ki parabriew. Haba pynpaw ba ki kynhun niam ne kynhun jingngeit ki don ka bor kaba khraw ban wanrah ïa ka jingïaieit, ka jingïalong kawei, ka KJCLF ka kyntu ïa ka sorkar ban peit ïa kine ki kam thombor bad ban teh lakam ïa ki da kaba khot ïa ka jingïakynduh lang jong ki nongïalam jong ki jait niam bapher bapher khnang ban wanrah ka jingïa shongsuk bad ban lait na ki kam thombor kiba kum kine.
Lah ban kdew hangne ba ha kine ki sngi kiba baladep, ki Khristan ha jylla Chhattisgarh, ki la shah thombor ha ki kynhun shit niam da kaba pynsangeh jubor ïa ka jingïaseng bad jingduwai jong ki. Don ruh kiba la shah sei jubor bad shah beh na ki ïing ki sem jong ki.
