Ka jingieid u Bah LG Shullai ïa ka jaidbynriew ka long ba um treh ban ïapeiñ ïa ka nongrim: T Shanpru

Shillong, Nohprah 21: U Bah Teibor Shanpru u nonghikai skul barim bad paralok ba jan bha jong u Bah LG Shullai haba ai jingkren kum u Kongsan ha ka lecture sah kynmaw ne ka Memorial Lecture halor ka jingim jong u kaba la pynlong da ka Khasi Jaintia welfare Association (KJWA) Research Cell kum shi bynta ban rakhe ïa ka lyngkhuh snem ba 20 jong ka jingkhlad noh jong u bad kumjuh ïa ka lyngkhuh snem ba 10 jong ka KJWA Research Cell u la ong ba lada kyrtiang dien ïa ki synñiang kiba u Bah LG Shullai u la noh sha ka jaidbynriew ka dawa ïa ngi kum ki longdien ban pyrto namar u da pyni ïa ka jingieid ïa ka jaidbynriew ka long kaba nylla bad um treh ruh ban ïapeiñ ïa ki nongrim kiba u don na bynta ki jingmyntoi shimet jong u.
U Bah Teibor u la ong ba kaei kaba u Bah LG Shullai u la leh mynba u dang long kum u CEM jong ka Khasi Hills Autonomous District Council (KHADC) ha kaba um mon ban ïapeiñ ïa ki nongrim jong u na bynta ka jingmyntoi shimet jong u ban pynïahap bad ka rukom pyrkhat ki paralok MDC jong u.
U la ïathuh ba ha kaba nyngkong eh ka jingleit jong u sha ka District ka long beit na bynta ban ka jaidbynriew hynrei ynda u la poi hangtai u la lap pynban ba kaei kaba kiwei ki pyrkhat kam dei eiei na bynta ka jingmyntoi ka jaidbynriew.
“Na kaei kaba la jia ha ki por jong i kum u CEM bad kat haduh kine ki sngi kiba mynta ngi lah ban sngewthuh shai ba ka saiñ pyrthei (politic) kan ym lah ne treh ban ïada na bynta ka jaidbynriew,” u la ong.
U Prof LS Gassah haba kren halor ki synñiang jong u Bah LG Shullai ha ka saiñ hima sima, u la ong ba kaei kaba u la pyrshang kum u nongthaw aiñ ha District Council ka long kaei kaei kaba dei ban ïaroh namar kiiba bun bah ki MDC ha kine ki sngi kiba ym pat ju pule satia wat tang ïa ka Khyrnit ba phra ka riti synshar ka ri kaba la pynkup bor ïa ka jingtreikam jong ki District Council.
“Ka jingdon jong ka District Council bad ki rukom synshar tynrai kum ki Dorbar Shnong ka long kaei kaei kaba ngin hap ban tyngkai bha namar kiwei ki jaidbynriew kiba naduh na shiliang duriaw ruh ki don kiba da wan khnang shaduh Shillong na bynta ka jaidbynriew bad ki rukom synshar tynrai jong ngi,” u la ong.
U la ong ruh ba ïa ki synñiang u Bah LG Shullai sha ka jaidbynriew lah ban sngewthuh na ki kot kiba u la thoh kiba long ruh ki jingmyntoi na bynta ka jingshemphang ki nongpule.
Haba kren halor ki synñiang kiba u la noh sha ka ka jaidbynriew kum u nongthoh u Prof SS Majaw u la ong ba ki jingthoh jong u lyngba ki poitry kiba u la thoh ka shong nongrim beit halor ka phang Hynniewtrep ne Ka Bri U Hynñiewtrep bad kane hi ka pyni ba u dei u Myllung ieid jaidbynriew.
U la ong ruh ba ki jingthoh jong u ïa ki poitry ha ka sonet ka pynlong wat u Myllung kum jong u SJ Duncann ban ainam ïa ki poitry sonet kiba u thoh kum ka Gilbertian Sonnet namar ki long kiba kynsai bad kiba pher na kiwei hynrei kiba don pat ka dur janai jong ka sonet.
U la ong ruh ba ka jingthoh khanan lyngkot bad ki prose ki la dei ki jingtrei kiba snah bha jong u hynrei sniewbok ba u la hap leit phai noh sha la u kynrad khlem pat da ïoh bha ban pynmih ïa ki jingthoh jong u.
Ha kane ka sngi la ïoh ruh ka jingkren na u khun u Bah LG Shullai u Bah A Lyndem uba la kren halor ki synñiang kiba u kpa jong u u la noh sha ka jaidbynriew la ha kaba ïadei kum u nongthoh ne u nongsaiñ pyrthei.